Вучоная змагла запусціць гульню Doom на кішачнай палачцы. Што?
У гэта складана паверыць, але відэагульні можна запускаць не толькі на камп'ютарах, тэлефонах і іншых прыладах, але і на звычайных бактэрыях, чаго і дамаглася даследчыца з Масачусецкага тэхналагічнага ўніверсітэта (MIT). Як яна гэта зрабіла і ці можна такім чынам прайсці гульню паўнавартасна? Расказваем.
Вучоная з MIT Ларэн Рамлан правяла эксперымент і змагла запусціць старую гульню Doom 1993 года на звычайных кішачных палачках. Хуткасць гульні пры гэтым прымушае жадаць лепшага, піша нямецкі навуковы партал Golem.de са спасылкай на вучоную.
Як адзначае Рамлан у сваёй навуковай працы, гульня Doom запускаецца не столькі на бактэрыях, а менавіта праз іх.
Даследчыца маніпулявала флуарэсцэнтнымі здольнасцямі кішачных палачак пры дапамозе лабараторнай тэхнікі (у якую быў загружаны зыходны код гульні) і зрабіла з гэтых бактэрый мініэкран, на якім адлюстроўвалася чорна-белая застаўка Doom.
Бялкі бактэрый пры гэтым выконвалі ролю пікселяў на мініэкране.
«Усё дзякуючы флуарэсцэнтным бялкам кішачных палачак, якія дапамагаюць выводзіць выяву на экран, але выключна ў чорна-белым колеры і вельмі маленькай разрозненнем (эксперыментальны экран з бактэрыямі меў разрозненне 32 x 48 пікселяў).
Частата кадраў у секунду пры гэтым складае адзін кадр у 8 гадзін 20 хвілін, што дазволіць цалкам прайсці гульню толькі за 600 гадоў», — паведамляе партал Golem.de.
Гэтая праблема, па словах вучонай, можа быць вырашана пры паскарэнні працэсу флуарэсцэнцыі бялкоў бактэрый.
Адзначым, што падобнае не з'яўляецца чымсьці дзіўным, асабліва калі ўлічваць папулярны і даўні сусветны трэнд, звязаны з гульнёй Doom 1993 года.
Трэнд кажа: «Doom працуе на ўсім».
І тут складана паспрачацца, бо людзі па ўсім свеце раз-пораз прымудраюцца запускаць гульню на абсалютна розных прыладах і прадметах: на аўтамабілях, калькулятарах, тостарах, халадзільніках, мікрахвалёўках, а таксама на вэйпах, лямпачках, бензапілах і нават на тэстах на цяжарнасць. Спіс вельмі доўгі і разнастайны.
Таму бактэрыі сталі толькі чарговым лагічным звяном у гэтым нястрымным трэндзе.
Каментары