«ДНР» запрашае Беларусь экспартаваць свае тавары праз парты акупаваных Марыупаля і Мелітопаля
Беларускі бок мог бы выкарыстоўваць парты анексаванай «ДНР» для сваіх экспартных паставак. Пра гэта заявіла член расейскага Савета Федэрацыі ад «ДНР» Наталля Ніканорава, паведамляе «Спутнік».
Паводле яе слоў, пра выкарыстанне партоў і стварэнне беларускага транспартнага хаба на Азоўскім моры ў «ДНР» «можна казаць не толькі гіпатэтычна». Яна сказала, што мае на ўвазе найперш марыупальскі порт.
«Калі казаць пра ўзʼяднаныя тэрыторыі агулам, то гэта яшчэ Мелітопаль», — сказала Ніканорава.
Па словах Ніканоравай, зацікаўленасць у падобным супрацоўніцтве ёсць, больш за тое, ужо вядзецца пэўная праца ў гэтым кірунку.
«Думаю, што ў найбліжэйшай будучыні мы ўбачым канкрэтныя праявы, вынікі гэтай дзейнасці, у гэтым кірунку ў тым ліку», — дадала яна.
Летась ТАСС паведамляў, што першае прадпрыемства з Беларусі пачало адгрузку збожжа на экспарт праз марскі порт Марыупаля. «Яно перавальвае на экспарт сваю сельгаспрадукцыю: збожжа, тэхнічныя культуры. Яны працуюць у нас ужо каля двух месяцаў, арандавалі складскія памяшканні», — паведамляла агенцтва.
Назву беларускай кампаніі і напрамкі паставак не агучылі, але адзначылі, што фірма вывучае магчымасці пераарыентаваць на Марыупаль увесь абʼём свайго экспарту, паколькі гэты транспартны калідор аказаўся карацейшы за іншыя магчымыя.
Пасля закрыцця праз санкцыі зручных партоў Літвы беларускі бок шукае спосабы транспарціроўкі сваіх грузаў. Разглядаўся нават варыянт пабудовы свайго порта ў Мурманску.
Бондарава захацела двухмоўя, як у Фінляндыі. Мы таксама за1
Каментары