«Міліцыянты самі былі ў шоку ад такога». Імаверна, затрымлівалі былога кіраўніка Гомеля Кірычэнку
Паводле інфармацыі «Свабоды», людзі, якія выходзілі пасля арышту з гомельскага ізалятара часовага ўтрымання ў сярэдзіне і канцы лютага, расказвалі, што былі там адначасова з былым кіраўніком Гомеля Пятром Кірычэнкам. Зараз ён займае пасаду старшыні Гомельскага абласнога аб’яднання прафсаюзаў. Ён жа ў снежні 2023 году ўзначаліў Гомельскую абласную выбарчую камісію і «выдатна» правёў апошнія так званыя выбары.
«Нам, арыштантам, самі канвойныя казалі, што Кірычэнка быў на «сутках». Але сядзеў асобна ад усіх «экстрэмістаў», на іншым паверсе. Міліцыянты самі былі ў шоку ад такога», — апавядаў «Свабодзе» адзін з тых, хто нядаўна вызваліўся з гомельскага ІЧУ.
Іншы жыхар Гомля, які таксама трапіў на «суткі» ў лютым, заўважаў, што па ізалятары «хадзіла такая інфармацыя», хаця сам асабіста ён не бачыў Кірычэнку.
Яшчэ адзін суразмоўца «Свабоды» сцвярджае, што ў канцы студзеня прасіўся на прыём да Кірычэнкі і не трапіў, бо таго не было на працы. На сайце Гомельскага абласнога аб’яднання прафсаюзаў з 23 студзеня па 15 лютага няма згадак пра мерапрыемствы з удзелам Пятра Кірычэнкі, хоць звычайна пра яго там пішуць часта.
Афіцыйнай інфармацыі пра магчымае затрыманне Пятра Кірычэнкі, а таксама пра яго прычыны не было.
Пётр Кірычэнка быў старшынёй Гомельскага гарадскога выканаўчага камітэта з 19 лістапада 2012 года па 12 снежня 2022 года. Быў унесены ў канадскі санкцыйны спіс за садзейнічанне ўварванню ва Украіну.
Цяпер чытаюць
Максім Знак: Мы з Ціханоўскай зайшлі падаваць скаргу ў кабінет Ярмошынай — але Ярмошынай там не было57
Каментары