Журналістам загадалі спыніць крадзеж сувеніраў са службовага самалёта Байдэна
Праверка інвентара самалёта Джо Байдэна пасля візіту прэзідэнта ЗША на заходняе ўзбярэжжа краіны ў лютым выявіла, што ў аддзеле для прэсы адсутнічаюць некалькі прадметаў. Сярод прадметаў, якія нібыта зніклі з самалёта, — фірмовыя навалачкі, шклянкі і талеркі ў залатой аправе, піша Бі-бі-сі.
Асацыяцыя карэспандэнтаў Белага дома папярэдзіла, што браць рэчы з самалёта забаронена. У мінулым месяцы асацыяцыя накіравала электронны ліст журналістам, у якім паведаміла, што такія паводзіны дрэнна адбіваюцца на прэс-пуле — групе журналістаў, якія едуць з прэзідэнтам, — а таму павінны спыніцца.
Журналістам часам на памяць дораць невялікія ўпакоўкі цукерак M&Ms, упрыгожаныя прэзідэнцкай пячаткай. Але ў той жа час і браць прадметы з лагатыпам Air Force One — у тым ліку сталовыя прыборы і ручнікі — было звычайнай справай на працягу многіх гадоў, сцвярджаецца ў справаздачах.
Самалёт Air Force One («Борт нумар адзін»), які Белы дом называе «офісам прэзідэнта ў небе», мае плошчу ў 372 квадратных метраў, размешчаную на трох узроўнях. Гэтыя памяшканні ўключаюць у сябе вялікі люкс для прэзідэнта, медыцынскі пункт з аперацыйным сталом, канферэнц-залу і сталовую, два камбузы для гатавання ежы, якія могуць накарміць 100 чалавек адначасова, а таксама спецыяльныя зоны для прэсы, VIP-персон, аховы і сакратара.
Дзякуючы перадавой авіёніцы і абароне, самалёт класіфікуецца як вайсковы самалёт, прызначаны для супрацьстаяння паветранаму нападу. Ён таксама здольны запраўляцца ў паветры, што дазваляе яму лётаць неабмежаваны час — гэта вельмі важна ў надзвычайнай сітуацыі.
Air Force One таксама забяспечаны абсталяваннем бяспечнай сувязі, што дазваляе самалёту функцыянаваць у якасці мабільнага каманднага цэнтра. На борце маецца 85 тэлефонных апаратаў, камплекты радыёстанцый і камп'ютэрных злучэнняў.
Прэзідэнт падчас палёту сядзіць наперадзе, а журналісты размяшчаюцца ў задняй частцы самалёта.
Цяпер чытаюць
Загінуў былы палітвязень Аляксей Ляўкевіч. Яго вызвалілі тры месяцы таму пасля візіту Коўла1
Загінуў былы палітвязень Аляксей Ляўкевіч. Яго вызвалілі тры месяцы таму пасля візіту Коўла
Пасол Украіны па пытаннях Беларусі адказаў на дыскусію Вячоркі і крытыкаў Ціханоўскай: Ваша ўзаемная непрымальнасць адыгрывае вельмі неканструктыўную ролю3939
Каментары