Былы сілавік затроліў Церцеля: Чаму астатніх кандыдатаў у КР уключылі ў склад экстрэмісцкага фарміравання, а мяне — не?
Андрэй Фёдараў калісьці працаваў у газеце Міністэрства абароны, а ў 2009 эміграваў у Аўстралію.
Кандыдат у Каардынацыйную раду Андрэй Фёдараў апублікаваў адкрыты ліст да старшыні КДБ Івана Церцеля.
Фёдараў абурыўся тым, што КДБ абвесціў выбарчы спіс «Закон і правапарадак» экстрэмісцкім фарміраваннем, але палічыў яго ўдзельнікамі толькі 19 чалавек з 20, якія балатуюцца ў КР. Фёдарава чамусьці пакінулі па-за бортам.
«У спісах экстрэмісцкіх арганізацый і іх удзельнікаў утрымліваецца недаравальная недакладнасць, — напісаў Фёдараў. —
Я глыбока расчараваны падобнай дыскрымінацыяй з боку вашага ведамства і магу растлумачыць яе толькі нядбайнасцю і недастатковым прафесіяналізмам вашых падначаленых. Ці ж, што яшчэ больш сумна, спробай нівеліраваць мой уклад у экстрэмісцкі рух.
Я прызнаю, што ў параўнанні з іншымі грамадзянамі са спісу групоўкі «Закон і правапарадак» мае заслугі не так прыкметныя, але ўсё ж хачу падкрэсліць, што лічу пазіцыю вашага ведамства дыскрымінацыйнай і несправядлівай».
Андрэю Фёдараву 46 гадоў. Ён скончыў Ваенную акадэмію Беларусі. Працаваў у газеце Міністэрства абароны «Во славу Родины» пяць гадоў, даслужыўся да звання капітана. Пасля працаваў журналістам на ВаенТБ, а таксама на Сталічным тэлебачанні. У 2009 годзе іміграваў у Аўстралію, дзе скончыў дзве магістратуры ў мясцовых універсітэтах. Атрымаў сертыфікацыю прыкладнога аналітыка паводзін у Аўстраліі і ЗША. Цяпер Фёдараў уладальнік і клінічны дырэктар кампаніі, якая працуе з людзьмі з адхіленнямі ў паводзінах і затрымкамі ў развіцці.
Каментары