У аўторак, 14 мая, у Кіеў прыбыў дзяржаўны сакратар ЗША Энтані Блінкен. Гэта першы візіт топ-чыноўніка ЗША ва Украіну пасля прыняцця пакета вайсковай дапамогі на $61 мільярд і чацверты пасля поўнамаштабнага ўварвання Расіі, піша «Украінская праўда».
«Сёння я вярнуўся ў Кіеў, каб прадэманстраваць нашу непахісную падтрымку Украіны, якая абараняе сваю свабоду ад расійскай агрэсіі», — абвясціў Блінкен у сацыяльнай сетцы X.
Неанансаваны візіт мае на мэце прадэманстраваць салідарнасць ЗША з Украінай, якая спрабуе адбіць расійскія атакі на сваёй паўночна-ўсходняй мяжы.
Блінкен прыбыў у Кіеў цягніком раніцай. Ён спадзяецца «паслаць магутны сігнал украінцам, якія, відавочна, знаходзяцца ў вельмі цяжкай хвіліне», сказаў агенцтву Reuters.com адзін з амерыканскіх чыноўнікаў на ўмовах ананімнасці.
«Місія міністра заключаецца ў тым, каб пагаварыць пра тое, як наша дадатковая дапамога будзе ажыццяўляцца такім чынам, каб дапамагчы ўмацаваць іх абарону і даць ім магчымасць усё больш адбіраць ініцыятыву на поле бою», — сказаў чыноўнік.
Падчас знаходжання ў Кіеве Блінкен сустрэнецца з прэм'ер-міністрам Украіны Дзянісам Шмыгалем, а пазней — з прэзідэнтам Уладзімірам Зяленскім.
Вяртанне ініцыятывы на полі бою можа аказацца недасяжнай. Пасля таго, як на мінулым тыдні расійскія войскі прарвалі абарону пад Харкавам, захапіўшы некалькі вёсак і адкрыўшы новы фронт на трэцім годзе вайны, Украіна была вымушаная накіраваць падмацаванне ў рэгіён.
Каментары