Злучаныя Штаты апынуліся ў палоне анамальных маразоў і снегападаў. Маштабны зімовы шторм паралізаваў жыццё ў двух трацінах краіны. Ахвярамі непагадзі сталі ўжо як мінімум 30 чалавек.
Спіс трагедый папаўняецца штодня. Сярод загінулых — людзі, якія трапілі пад снегаўборачныя машыны ў Масачусетсе і Агая, падлеткі, што разбіліся падчас катання на санках у Арканзасе і Тэхасе, а таксама ахвяры абмарожвання. Толькі ў Нью-Ёрку за выходныя на вуліцах знайшлі целы васьмі чалавек. У Канзасе паліцыя выявіла засыпанае снегам цела 28‑гадовай жанчыны, якая выйшла з бара без паліто і тэлефона.
Энергетычны і транспартны параліч
На вечар панядзелка больш за 560 тысяч дамоў заставаліся без электрычнасці. Найбольш складаная сітуацыя склалася на поўдні краіны — у Місісіпі і Тэнесі, дзе абліваха абарвала лініі электраперадач. У многіх гарадах адкрыты спецыяльныя пункты абагрэву, бо маразы месцамі дасягаюць —31°C.
Транспартная сістэма ЗША таксама перажыла адзін з самых цяжкіх этапаў з часоў пандэміі. Скасавана або адкладзена больш за 12 000 авіярэйсаў. У нядзелю было адменена 45% усіх унутраных рэйсаў краіны.
Школы ў многіх штатах закрытыя альбо пераведзены на дыстанцыйнае навучанне.
Эксперты прагназуюць, што страты для эканомікі ЗША складуць некалькі мільярдаў даляраў. У Місісіпі гэты ледзяны шторм ужо назвалі найгоршым з 1994 года — паводле слоў мясцовых улад, вуліцы гарадоў пасля падзення тысяч дрэў выглядаюць так, «нібыта па кожнай прайшоўся тарнада».
Цяпер чытаюць
У дзень, калі памілавалі палітвязня Дароніна, ягонай жонцы прысудзілі 8,5 гадоў калоніі за ўдзел у дваровым чаце3
Каментары