Герасімаў аб’явіў аб захопе горада Купянск-Вузлавы, да якога расійскае войска нават не падышло
Кіраўнік расійскага Генштаба Валерый Герасімаў заявіў, што расійскія войскі захапілі горад Купянск-Вузлавы ў Харкаўскай вобласці. Згодна з картамі OSINT-аналітыкаў, расійскія вайскоўцы нават не падышлі да гэтага населенага пункта. Адразу некалькі расійскіх праваенных тэлеграм-каналаў указалі на несапраўднасць заявы Герасімава, піша «Агенцтва».
Сваю заяву Герасімаў зрабіў падчас інспекцыі групоўкі войскаў «Захад», відэа з якой раніцай у аўторак апублікавала Мінабароны. Паводле яго слоў, Купянск-Вузлавы «вызвалены», і расійскія вайскоўцы зараз «ажыццяўляюць праверку і зачыстку гарадскіх кварталаў».
На гэтую заяву звярнулі ўвагу некалькі z-каналаў. «Мы, напэўна, пойдзем пакурым пасля такога прыгожага дакладу. Моўчкі», — напісаў z-канал «Два майора».
Аўтар z-канала «Romanov Лайт» Уладзімір Раманаў назваў заяву Герасімава вынікам «замалёвак», маючы на ўвазе практыку аб’яўляць аб прасоўваннях, якія не адпавядаюць рэчаіснасці.
Прарасійскі тэлеграм-канал «Белорусский силовик» апублікаваў карту, на якой правёў чорным колерам мяжу тэрыторыі пад кантролем УСУ і падкрэсліў сінім населеныя пункты, якія «мякка кажучы, не зусім пад нашым кантролем». З карты вынікае, што расійскае войска не падышло да Купянск-Вузлавога.
Паводле звестак блізкага да ўкраінскага Мінабароны DeepState, ад Купянска-Вузлавога да тэрыторыі, якую кантралююць расійскія вайскоўцы, не менш за 10 км наўпрост.
Фінскі праект Blackbird таксама пацвярджае, што да межаў горада яшчэ не падышла «шэрая зона».
Згодна з картай амерыканскага Інстытута вывучэння вайны (ISW), населены пункт цалкам пад кантролем Украіны.
Купянск-Вузлавы знаходзіцца прыкладна за пяць кіламетраў на поўдзень ад Купянска.
Аб захопе Купянска Герасімаў паведамляў Уладзіміру Пуціну яшчэ ў лістападзе 2025 года. Насамрэч, цалкам захапіць гэты горад расійскім вайскоўцам так і не ўдалося, сведчылі карты OSINT-аналітыкаў. А ў канцы снежня расійскія вайскоўцы страцілі кантроль нават над ужо захопленымі ўчасткамі ў горадзе.
Цяпер чытаюць
Бабарыка заявіў пра вяртанне ў палітыку і назваў вінаватага ў тым, што змены не адбыліся ў 2020-м15
Бабарыка заявіў пра вяртанне ў палітыку і назваў вінаватага ў тым, што змены не адбыліся ў 2020-м
Дзеці злізвалі з бруднай падлогі пралітае малако. Якой пабачыў замежнік Беларусь, спустошаную расійскімі і шведскімі войскамі ў час Паўночнай вайны1111
Каментары