Пад уплывам расійскай агрэсіі ўкраінцы вярнуліся да ўкраінскай мовы — лічбы
Украінскую мову роднай лічаць 78% апытаных украінцаў, хаця ў 2006 годзе такіх было крыху больш за палову — 52%. Павялічылася і колькасць грамадзян, якія лічаць сябе часткай украінскай культурнай традыцыі (76%). Вынікі апытання 24 ліпеня апублікаваў Цэнтр Разумкова, паведамляе suspilne.media.
Калі яшчэ ў 2006 годзе толькі 52% лічылі роднай мовай украінскую мову, то ў 2024 годзе гэтая лічба складае ўжо 78%. Пры гэтым толькі 6% назвалі роднай расійскую мову, хаця ў 2006 годзе такіх было 31%. Амаль не змянілася колькасць тых, хто лічыць роднымі абедзве мовы — 13% супраць 16% у 2006 годзе.
Пры гэтым 69,5% рэспандэнтаў лічаць, што валодаюць украінскай мовай свабодна, 27% — што дастаткова для штодзённых зносін, 2% разумеюць дрэнна, а 0,5% не ведаюць яе зусім.
Павялічылася і колькасць тых, хто размаўляе дома па-ўкраінску — з 46% да 70,5%. Істотна скарацілася расійская — з 38% у 2006 годзе да 11% у 2024 годзе.
Таксама 75,5% апытаных лічаць, што больш прэстыжна размаўляць па-ўкраінску сярод калег і сяброў. А 16% лічаць, што мова тут не важная.
Значна вырасла доля тых, хто лічыць сябе часткай украінскай культурнай традыцыі. Калі ў 2006 годзе іх было 56%, то цяпер 76%. З 7% да 14% вырасла доля тых, хто лічыць сябе часткай агульнаеўрапейскай культурнай традыцыі. Адпаведна, зменшылася колькасць тых, хто ідэнтыфікуе сябе з рускай (з 11% да 0,5%) і савецкай (з 16% да 4%) культурнай традыцыяй.
Прычым змяншэнне заўважнае сярод украінамоўных грамадзянаў — ад 9% да 1%. Рускамоўныя ідэнтыфікуюць сябе з савецкай культурнай традыцыяй амаль гэтак жа, як і ў 2006 годзе (23,5% тады і 22% цяпер).
Апытанне праводзілася з 6 па 12 чэрвеня 2024 года па ўсёй тэрыторыі Украіны, акрамя часова акупаваных тэрыторый і тых, дзе вядуцца баявыя дзеянні.
Чалы: Чым даўжэй Лукашэнка марудзіць з выбарамі, тым больш аргументаў, каб яму не ісці4
Каментары