Pad upłyvam rasijskaj ahresii ŭkraincy viarnulisia da ŭkrainskaj movy — ličby
Ukrainskuju movu rodnaj ličać 78% apytanych ukraincaŭ, chacia ŭ 2006 hodzie takich było krychu bolš za pałovu — 52%. Pavialičyłasia i kolkaść hramadzian, jakija ličać siabie častkaj ukrainskaj kulturnaj tradycyi (76%). Vyniki apytańnia 24 lipienia apublikavaŭ Centr Razumkova, paviedamlaje suspilne.media.
![](http://nashaniva.com/img/w840d4webp1/photos/z_2024_07/-v5z5p.jpg.webp)
Kali jašče ŭ 2006 hodzie tolki 52% ličyli rodnaj movaj ukrainskuju movu, to ŭ 2024 hodzie hetaja ličba składaje ŭžo 78%. Pry hetym tolki 6% nazvali rodnaj rasijskuju movu, chacia ŭ 2006 hodzie takich było 31%. Amal nie źmianiłasia kolkaść tych, chto ličyć rodnymi abiedźvie movy — 13% suprać 16% u 2006 hodzie.
Pry hetym 69,5% respandentaŭ ličać, što vałodajuć ukrainskaj movaj svabodna, 27% — što dastatkova dla štodzionnych znosin, 2% razumiejuć drenna, a 0,5% nie viedajuć jaje zusim.
Pavialičyłasia i kolkaść tych, chto razmaŭlaje doma pa-ŭkrainsku — z 46% da 70,5%. Istotna skaraciłasia rasijskaja — z 38% u 2006 hodzie da 11% u 2024 hodzie.
Taksama 75,5% apytanych ličać, što bolš prestyžna razmaŭlać pa-ŭkrainsku siarod kaleh i siabroŭ. A 16% ličać, što mova tut nie važnaja.
Značna vyrasła dola tych, chto ličyć siabie častkaj ukrainskaj kulturnaj tradycyi. Kali ŭ 2006 hodzie ich było 56%, to ciapier 76%. Z 7% da 14% vyrasła dola tych, chto ličyć siabie častkaj ahulnajeŭrapiejskaj kulturnaj tradycyi. Adpaviedna, źmienšyłasia kolkaść tych, chto identyfikuje siabie z ruskaj (z 11% da 0,5%) i savieckaj (z 16% da 4%) kulturnaj tradycyjaj.
Pryčym źmianšeńnie zaŭvažnaje siarod ukrainamoŭnych hramadzianaŭ — ad 9% da 1%. Ruskamoŭnyja identyfikujuć siabie z savieckaj kulturnaj tradycyjaj amal hetak ža, jak i ŭ 2006 hodzie (23,5% tady i 22% ciapier).
Apytańnie pravodziłasia z 6 pa 12 červienia 2024 hoda pa ŭsioj terytoryi Ukrainy, akramia časova akupavanych terytoryj i tych, dzie viaducca bajavyja dziejańni.
Kamientary