Тур з Мінска за $9000 на сям'ю, з Польшчы — за $1000. Беларускі расказалі, як сёлета адпачывалася ў Турцыі

З Беларусі

Аліна лятала ў Турцыю з мужам і гадавалым сынам, а таксама з бабуляй — яе маладыя бацькі вырашылі ўзяць у дапамогу, каб мець магчымасць адпачываць і без дзіцяці. Ляцелі з Мінска, 5 гадзін пералёту маленькаму хлопчыку даліся даволі складана.

— Але ж, на жаль, варыянтаў звазіць дзіця на мора цяпер няшмат. Турцыя выглядае самай рэальнай з магчымасцяў, — распавядае дзяўчына. — Ты ж не будзеш стаяць з гадавасікам суткі на мяжы.

Аліна прызнаецца, што гатэль сям’я выбрала не самы танны (але далёка і не самы дарагі з магчымых). За адпачынак 11 начэй для трох дарослых і аднаго дзіцяці заплацілі ажно $9000. Менавіта высокі кошт дзяўчына лічыць галоўным мінусам адпачынку.

— Гатэль, сэрвіс, ежа — усё на самым лепшым узроўні. У нашым гатэлі было шмат як расіян і казахаў, так і еўрапейцаў — французаў, брытанцаў, немцаў.

Іншая беларуска, Марына, лятала на адпачынак у Турцыю адна.

— З сумам згадваю, што ў 2010-м лятала ў Кемер з сяброўкай за $1160 на дваіх на 10 начэй. Канечне, гэта быў не шыкоўны, але цалкам прыстойны пяцізоркавы гатэль на першай лініі. Цяпер жа цэны на Турцыю паляцелі кудысьці ў космас. У турфірме самы танны варыянт для мяне адной на 10 начэй прапаноўвалі за $1000 — і гэта літаральна быў нейкі клапоўнік толькі са сняданкамі. Бачыла ў горадзе рэкламу тура, дзе абяцалі тыдзень адпачынку ў Антальі для дваіх «усяго» за 7 тысяч рублёў. Так і напісана — усяго! Быццам бы 7 тысяч рублёў за тыдзень для беларусаў — гэта капейкі.

Але Марына вырашыла ўсё ж набыць для сябе тур у Турцыю. Заплаціла каля $2600 за 10 начэй. А вось нагода выбраць для адпачынку менавіта гэту краіну кагосьці можа і шакаваць.

— Я лічу, што галоўным брэндам Турцыі даўно варта зрабіць турэцкіх мужчын. Яны і выглядаюць шыкоўна, і ўмеюць зачароўваць жанчын. І калі я шчыра кажу пра гэта некаму са знаёмых, яны робяць вялікія вочы: «Туркам жа толькі адно трэба!» Можна падумаць, беларускія мужчыны шукаюць жанчын для таго, каб творчасць Караткевіча ці Быкава абмяркоўваць.

Усе мы шукаем яскравы сэкс. Дык туркі, у адрозненне ад беларусаў, умеюць зрабіць прыемна — як на словах, так і на справе. З прыгожым туркам ты адчуваеш сабе прынцэсай, а нейкі пузаценькі беларус будзе лічыць, што гэта ты павінна танчыць полечку, каб спадабацца яму.

З Польшчы

Ганна з мужам звычайна ездзіць адпачываць у Турцыю ў маі ці ўжо ў верасні-кастрычніку, калі цэны не такія вялікія, як у высокі сезон.

— Мы заўсёды імкнёмся ўкласціся ў бюджэт 1000 еўра на траіх — два дарослыя і дзіця. Звычайна ў нас гэта атрымліваецца дзякуючы таму, што выбіраем гатэлі сярэдняга класу. За апошнія гады, канечне, цэны ў Турцыі на ўсё павысіліся. Мне здаецца, што выбар ежы пры гэтым у гатэлях стаў менш разнастайным. Але ў асноўным для тураў з Варшавы ўсё больш-менш стабільна.

Ганна адзначае, што галоўнае пры выбары гатэля глядзець на водгукі турыстаў — яна траціць на гэта шмат часу, чытаючы водгукі і на англамоўных сэрвісах, і на рускамоўных, і на польскамоўных.

— Бывае, што водгукі на пяцізоркавы гатэль значна горшыя, чым на трохзоркавы. Праглядаю таксама рэйтынг на Букінгу і ўжо сыходзячы з гэтага прымаю канчатковае рашэнне.

Дзяўчына кажа, што параўноўвала цэны з вылетам з Польшчы і Літвы, і другі варыянт на 30-40% звычайна даражэйшы.

— А калі казаць пра варыянты з Беларусі, дык мае сябры разглядалі магчымасць прыляцець у наш гатэль у нашы даты, каб адпачыць разам — для іх кошт з вылетам з Мінску быў амаль у тры разы вышэйшы, чым для нас з Варшавы. У выніку яны адмовіліся ад такой ідэі і адпачывалі ў Беларусі.

Сёлета Ганна з сям’ёй у маі адпачывала ў Сідэ.

— На гэтым курорце звычайна шмат немцаў, сёлета таксама сустракала нямала скандынаваў — кампаніі са Швецыі, Нарвегіі. Было шмат украінцаў — яны таксама ляцелі з Польшчы.

Турцыю сям’я выбірае, таму што там цудоўнае надвор’е — нават калі ты адпачываеш вясной ці восенню.

— Калі казаць пра мінусы, для мяне гэта аэрапорт Антальі, які моцна перагружаны — трэба шмат часу чакаць у чарзе і на пасадку, і на ўзлёт. Ну і ехаць з аэрапорту шмат часу — калі твой гатэль у 120 кіламетрах ад Антальі, трансфер можа займаць да 3 гадзін.

З Літвы

Вольга разам з мужам і чатырохгадовым дзіцём ляцела ў Анталью з Вільнюса. За тур на 11 начэй у пяцізоркавы гатэль на «ультра ўсё ўключана» за траіх аддалі каля $2760.

— Мне здаецца, цэны тураў растуць больш для тых, хто ляціць з Беларусі. У мінулым годзе да нас у гатэль прыляталі сябры з Мінска — іх тур на дваіх на тую ж колькасць дзён каштаваў на $100 даражэй, чым наш на траіх. У гэтым годзе мы таксама планавалі ляцець у адзін гатэль (ужо іншы) разам з розных краін. Але высветлілася, што для сяброў тур будзе каштаваць ажно на $1000 даражэй, чым нам.

Турцыю сям’я выбрала таму што лічыць такі варыянт аптымальным для адпачынку з дзіцём — не трэба думаць, чым накарміць дзіця, а калі-некалі яго могуць забаўляць аніматары. Плюс у Турцыі любяць дзяцей і не будуць закатваць вочы, калі дзіця паводзіць сябе не як лялька.

— У нашым гатэлі ў асноўным былі турысты з Еўропы — нават персанал больш размаўляў на англійскай і нямецкай. Але не пашанцавала нам у іншым — вокны нашага нумара выходзілі на суседні гатэль.

А той відавочна арыентаваўся на расіян, таму кожны дзень падчас дзённага сну сына мы з мужам пакутавалі ад аглушальнай рускай папсы — пачынаючы ад жудаснай «Дарите женщинам цветы» да прапагандысцкай «Матушка земля, белая берёзонька». Здаецца, песня пра «святую Русь» раз’юшыла не толькі нас, бо з нейкага моманту менавіта яе пачалі ўключаць на мінімальны гук.

• 1
• 7
• 2
• 9
• 5
• 1
• 0
• 0