Добраахвотнік Грот: Твая краіна ў акупацыі, што ты робіш, каб яе вызваліць?
У новым выпуску ток-шоу «Жыццё-маліна» былы беларускі добраахвотнік Арцём «Грот» Кузьміч выказаў сваё меркаванне адносна таго, чаму мала беларусаў ваюе ва Украіне, і чаму ён лічыць беларусаў «амаль мёртвай нацыяй».
Кузьміч адзначае, што нельга параўноўваць рэпрэсіўную машыну ў Беларусі і ва Украіне. Ён упэўнены, што ў Беларусі яе можна перамагчы толькі зброяй.
«Толькі ваяваць. Людзі выходзілі на пратэсты таму, што Лукашэнка акупаваў іх краіну. Краіна ў акупацыі. Прайшло чатыры гады з часу пратэстаў. Твая краіна ў акупацыі. Што ты робіш, каб яе вызваліць?
Што робяць сотні беларусаў, якія ваююць ва Украіне, мне зразумела. Што робяць дзясяткі і сотні тысяч беларусаў, якія знаходзяцца ў Еўропе, мне незразумела», — выказвае сваю пазіцыю Кузьміч.
Мужчына тлумачыць, што ў любой нацыі каля 2% насельніцтва складаюць воіны. Але ён задаецца пытаннем, дзе ў Беларусі гэтыя людзі.
«Нас 10-мільённая краіна. Два адсоткі — гэта 200 тысяч людзей. Дзе гэтыя 200 тысяч штыкоў? Чаму яны не прыехалі сюды (ва Украіну — НН), не ўзялі ў рукі зброю, не зрабілі беларускую армію і не вызвалілі сваю краіну?», — задаецца пытаннем «Грот» і дае свой адказ на яго.
«Па-першае, большасць баязліўцаў. Па-другое, большасць не падзяляе думку пра тое, што Расія — наш вораг».
Кузьміч згадвае, што ён прыехаў ваяваць ва Украіну з тым, каб потым змагацца з акупацыяй Беларусі. Але на сённяшні момант вызваленне Беларусі «выглядае амаль немагчымым».
«Хутчэй за ўсё, гэта так і застанецца. Застанецца немагчымым. Па прычыне таго, што беларусы не хочуць ваяваць за сваю краіну. Максімум яны хочуць выйсці з шарыкамі, сцяжкамі, зняўшы абутак, залезці на лаву, пакрычаць «Далоў». Потым яны бачаць пагрозу і разбягаюцца па хатах».
«Грот» адзначае, што разумее, чаму так адбываецца, і прапануе рашэнне:
«Рэпрэсіўная машына Беларусі нашмат мацнейшая [за ўкраінскую]. Рэальна вельмі цяжка супрацьстаяць АМАПу на вуліцы. Тады што трэба рабіць? Трэба шукаць шлях, як ваяваць супраць гэтага ворага. Ён толькі адзін, і [знаходзіцца] ва Украіне.
Украіна дае пляцоўку. Адна справа, калі гэта было ў 2014-м годзе. Тады было цяжка зрабіць нейкае беларускае фарміраванне. З пачаткам поўнамаштабнай вайны 2022-га года прыехалі б 100 тысяч, ім бы выдалі зброю, забеспячэнне, тэхніку, і яны маглі б рабіць што хацелі ў плане сваіх намераў. (…) Яны маглі б з Украіны ісці куды заўгодна. Але яны не паехалі».
Мужчына адзначае, што ён з павагай адносіцца да тысяч людзей, якія знаходзяцца ў Беларусі ў зняволенні, людзей, якія загінулі ад катаванняў, тых, хто знік без вестак, і тых, хто адседзеў, выйшаў і зразумеў, што пратэсту няма і з'ехаў ва Украіну ваяваць.
«Беларусы — амаль мёртвая нацыя»
У час інтэрв'ю Кузьміч таксама патлумачыў, чаму ён лічыць беларусаў амаль мёртвай нацыяй.
«Тут пытанне не ў часе, а ў колькасці. Беларусаў, я думаю, каля 10 тысяч. Усе астатнія — гэта не беларусы. (…) Гэта мая думка. Хто са мной не пагодзіцца, можа прыехаць да мяне ў Кіеў, і я з ім пагавару. Я яму проста дам у жбан і на гэтым усё скончыцца», — кажа «Грот» і дадае:
«Я не імкнуся быць дыпламатам, выглядаць «добрым хлопцам», каб мяне ўсе любілі, на мяне падпісваліся. Мяне гэта зусім не хвалюе. Я ёсць тым, кім ёсць. Я ўпэўнены, што раблю правільныя рэчы, рухаюся правільна і ніколі нідзе не зварочваў.
Як я сказаў сабе 15 гадоў таму, калі падарвалі метро (насамрэч 13 гадоў таму, 11 красавіка 2011 года — НН), што я буду ўсё рабіць супраць гэтага ворага, так і рухаюся далей, змяняючы метады ў залежнасці ад свайго стану здароўя і гэтак далей. Але як я пачаў, так і рухаюся.
Таму, калі хто са мною не пагодзіцца, я магу ў яго ў адказ спытаць, а хто ён такі, што ён зрабіў такога, каб я ўвогуле яго паважаў і слухаў».
Беларус адправіўся на вайну пасля выпадковай сустрэчы з Някляевым. У 23 гады ў баі ён страціў нагу. Вось што ён робіць цяпер
Украінцаў скарыла ВІДЭА, як ветэран на пратэзе разбірае завалы дзіцячай клінікі ў Кіеве. Аказалася, гэта беларус
«У нас тут свая Беларусь»: спецрэпартаж з трэніровачнай базы палка «Азоў» у Кіеве
Колькі насамрэч цягнуцца працоўныя паездкі Лукашэнкі? Цікавыя лічбы7
Каментары
То же что делали предыдущие волны эмиграции после всех восстаний -начиная от Костюшко -слушают Полонез Огинского! По данным различных исследований, число людей составляющих белорусскую диаспору находится между 2.5 и 3.5 миллионами человек.