Роза Турарбекава патлумачыла, чаму пайшла з Каардынацыйнай рады
У эфіры «Еўрарадыё» гісторык і палітолаг Роза Турарбекава запэўніла, што яе рашэнне не было спантанным і імпульсіўным.
«Прычын для сыходу было шмат, але я не сыходзіла, таму што кожны раз мае калегі, мае супольнікі па фракцыі (і не толькі яны) прыводзілі даволі важкія аргументы для таго, каб я паспрабавала застацца і паглядзець, як будуць развівацца падзеі далей. Яны пераконвалі мяне ў тым, што, мабыць, я занадта песімістычна гляджу на гэта, бо літаральна з першага пасяджэння я не хавала, што расчараваная і пісала з пытаннем: ці канец гэта дэмакратыі ў дэмакратычных сілах?» — падзялілася палітолаг.
«Я думала, што, мабыць, сапраўды чагосьці не бачу і трэба паглядзець, як сітуацыя будзе развівацца. Але, на жаль, сітуацыя развіваецца не найлепшым чынам. Мой сыход з КР — не гучнае ляпанне дзвярыма, не гучная акцыя, каб паказаць сваё «фе» Каардынацыйнай радзе».
На рашэнне пайсці паўплывалі і прычыны асабістага характару, якія жанчына не называе:
«Я прыняла рашэнне, што сыходжу, пасля таго, як дадаліся яшчэ мае асабістыя прычыны, якія я не збіраюся агучваць, яны проста сталі апошнім аргументам, чаму я павінна пайсці. Але я вырашыла пачакаць да пачатку канферэнцыі «Новая Беларусь», каб не ладзіць дэмарш напярэдадні».
Палітолаг пацвердзіла, што пры гэтым працягне супрацоўніцтва з КР далей.
«Я лічу, што вельмі многім нашым дэлегатам (і не толькі ім, як высвятляецца) не хапае, можа быць, ведаў у сферы паліталогіі ці культуры палітычнай — прыхільнасці нормам і прынцыпам у першую чаргу. І не хапае здаровай канструктыўнай крытыкі, якую варта ўспрымаць», — патлумачыла яна.
Каментары
Что она вообще раньше то сделала?