Экс-прэзідэнт ЗША і кандыдат на выбарах-2024 даў інтэрв'ю Ілану Маску. Там Трамп выказаўся наконт вайны ва Украіне.
Трамп даў зразумець, што вайна пачалася з-за «дурных рэчаў», якія зрабіў Байдэн — напрыклад, заяў, што Украіна можа быць у NATO, паведамляе «Політіка страны»
Таксама ён назваў Пуціна «добрым перамоўшчыкам» і заявіў, што ва Украіны «няма людзей» для перамогі.
«Калі я сышоў [з пасады прэзідэнта ЗША ў студзені 2021 года], яны пачалі фармаваць вялікае войска на мяжы з Украінай. Я думаў, што ў выпадку з Пуціным, а ён добры перамоўшчык, яны робяць гэта, каб весці перамовы.
А потым Байдэн пачаў казаць дурныя рэчы. Напрыклад, ён сказаў, што Украіна можа быць у NATO. Колькі NATO існавала, столькі Расія казала, што ніколі на гэта не пойдзе. А тут мы бярэм і гаворым гэта. Бо ў нас прэзідэнт з нізкім IQ. У яго ён быў нізкі яшчэ 30 гадоў таму, а цяпер, напэўна, наогул яго няма. Расія перамагла Германію разам з намі. Напалеон. У іх велізарная сіла. А ва Украіны цяпер нават людзей няма. Яны адпраўляюць на вайну маладых і пажылых людзей. Мы ў жудасным становішчы», — сказаў Трамп.
Ён таксама заявіў, што плануе «паладзіць» з Пуціным. І паведаміў, што пагражаў яму ў перыяд свайго прэзідэнцтва, калі той атакуе Украіну.
«Я сказаў Уладзіміру Пуціну: «Не рабі гэтага. Ты не можаш гэта зрабіць, Уладзімір. Дрэнныя дні прыйдуць. Не рабі гэтага». Я сказаў яму, што я зраблю ў адказ на яго дзеянні. Ён сказаў: «Гэта немагчыма». Я сказаў: «Яшчэ як магчыма». Гэта была наша апошняя размова. Ён бы ніколі гэтага не зрабіў. Я ладзіў з ім. Я спадзяюся, і цяпер з ім зладзіць. Гэта будзе вельмі добра», — сказаў Трамп.
Ён таксама абвінаваціў Абаму з Байдэнам, што тыя зрабілі саюзнікамі і Расію, і Кітай.
«Калі вы студэнт гістарычнага факультэта, то вы першым чынам павінны зразумець, што нельга дапусціць супадзення Расіі і Кітая», — дадаў Трамп.
Са слоў кандыдата ад рэспубліканцаў, свету цяпер пагражае ядзерная катастрофа, а не кліматычная.
«Людзі кажуць пра глабальнае пацяпленне, змяненне клімату, але яны ніколі не кажуць пра ядзернае «пацяпленне». А гэта праблема сёння. У нас ёсць пяць краін з вялікай ядзернай магутнасцю. Яшчэ і іншыя да іх далучаюцца. Гэта вельмі небяспечна. І калі я кажу, што прадухілю Трэцюю сусветную вайну, я менавіта гэта і зраблю. Але праўда ў тым, што гэтая вайна ўжо будзе не пра войска, танкі і салдат, якія страляюць адзін у аднаго. Гэта будзе іншы ўзровень разбурэнняў, які яшчэ ніхто ніколі не бачыў», — сказаў Дональд Трамп.
У размове з Трампам Маск прапанаваў сябе на пасаду ў ягонай адміністрацыі, калі той вернецца ў Белы дом. Мільярдэр кажа, што можа дапамагчы «стрымліваць дзяржаўныя выдаткі». Трамп адказаў, што яму было б гэта прыемна, бо мільярдэр з'яўляецца «выдатным эканамістам».
Інтэрв'ю ў жывым эфіры прагледзелі 1,3 мільёна чалавек.
Каментары
пес да бол..