Карціны з апалага лісця «малюе» на газонах і зялёных зонах дворнік Дзяніс Юркоў, піша «Мінск-Навіны».
Выбар прафесіі Дзяніс Юркоў патлумачыў двума прычынамі:
— З улікам стану здароўя, выбар прафесій для мяне не занадта шырокі, таму з 2008-га працую дворнікам. Знаёмы параіў прадпрыемства, якое якраз шукала супрацоўнікаў па навядзенні парадку на прылеглай тэрыторыі. Люблю наводзіць чысціню і парадак, таму ўцягнуўся маментальна.
Першая карціна з апалага лісця з'явілася ў 2018-м.
— Спачатку выклаў сонейка, потым — хатку, сфатаграфаваў выключна для сябе, — успамінае суразмоўца. — А праз некалькі дзён у мяне інтэрв'ю ўзялі. Як высветлілася, распавялі жыхары суседніх шматпавярховікаў — так ім спадабаўся малюнак.
Сталі паступаць «заказы» — выкласці з лісця сэрцайкі, божых каровак, смайлы і нават прызнанні ў каханні.
Прыкладна ў той жа час Дзяніс завёў старонку ў сацыяльнай сетцы, дзе дзяліўся сваёй творчасцю. Прызнаецца, што водгукі спрэс станоўчыя.
Самае надзённае там пытанне: колькі можа праляжаць такая карціна? Лістота мае ўласцівасць хутка высыхаць.
— Або намакаць, — удакладніў Дзяніс. — Таму пасля дажджу трэба прыбіраць малюнак — ён маментальна цямнее. А вось у сухое і яснае надвор'е карцінай можна і тыдзень любавацца. Праўда, гэтая восень не шчодрая на «расходнікі». На тых жа каштанах лісце вельмі хутка абсыпалася і пажухла. А клёны толькі нядаўна пачалі скідаць.
Цяпер чытаюць
«Фемінізм у маім выпадку перамог». Вераніка Станкевіч — пра дапамогу палітвязням у «Вольных» і планы на вяселле з Івуліным13
Каментары