Шведы прадалі мабільнага распрацоўшчыка з беларускімі каранямі больш чым за мільярд даляраў
Распрацоўшчык мабільных казуальных гульняў родам з Беларусі Easybrain зноў стаў аб'ектам M&A здзелкі. У пачатку 2021 года яго купіла шведская кампанія Embracer Group за 640 мільёнаў даляраў. Зараз яна прадала актыў — удвая даражэй, піша Devby.io.
Шведскі холдынг Embracer Group абвясціў пра ўгоду па продажы Easybrain швейцарскаму паблішару мабільных гульняў Miniclip. Сума ўгоды — 1,2 мільярда даляраў.
У выніку чысты доўг шведскай кампаніі (13,2 мільярда шведскіх крон, або 1,2 мільярда даляраў) знізіцца да 0,5 мільярда крон (45,3 мільёна даляраў), гаворыцца ў рэлізе.
Чакаецца, што ўгода будзе закрытая ў пачатку 2025 года.
«Гэтая транзакцыя змяняе фінансавае становішча Embracer, ставячы нас у больш моцную пазіцыю для росту кошту», — заявіў сузаснавальнік і CEO Embracer Ларс Вінгефорс.
Miniclip — швейцарскі выдавец мабільных гульняў, на рынку з 2001 года. У лютым 2015 года стаў часткай кітайскай тэхналагічнай карпарацыі Tencent.
Easybrain прабыў у складзе Embracer Group крыху менш за чатыры гады. Шведскі холдынг набыў мабільнага распрацоўшчыка ў лютым 2021 года за 640 мільёнаў даляраў. Гэта тады стала падзеяй для беларускай ІТ-супольнасці: за калег радаваліся і абмяркоўвалі, чаму шведы не спалохаліся палітычных рызык. Як мінімум год пасля гэтага ўсё яшчэ ішло добра: Easybrain была самым прыбытковым падраздзяленнем у шведскім холдынгу, і сам холдынг нарошчваў продажу.
Але потым, відавочна, сітуацыя памянялася. У пачатку 2024 года Embracer Group аказалася ў топе па колькасці звольненых супрацоўнікаў.
***
Easybrain — распрацоўшчык мабільных гульняў, спецыялізуецца на галаваломках і лагічных гульнях. Колькасць супрацоўнікаў на пачатак 2024 года — 340 чалавек. Штаб-кватэра знаходзіцца ў Лімасоле (Кіпр), па-ранейшаму ёсць офіс распрацоўкі ў Мінску.
Заснавальнікі кампаніі — Пётр Скаромны, Мацвей Цімашэнка і Алег Грушэвіч.
Па выніках 2020 года Easybrain увайшла ў топ-3 самых папулярных беларускіх распрацоўшчыкаў, па даных Sensor Tower. Гульні і праграмы кампаніі карыстальнікі спампавалі 328 мільёнаў разоў (+75% да 2019 года).
Па стане на люты 2021 года гульні Easybrain мелі 750 млн установак і 12 млн карыстальнікаў у дзень. Партфоліа ўключае Sudoku.com, Nonogram.com, у 2020 годзе ў ім з'явіліся Art Puzzle, Killer Sudoku, Nonogram.com Color. У пачатку 2021 года кампанія працавала з 15 гульнямі.
Выйшаў на свабоду 76-гадовы Сямён Добкін, брат заснавальніка EPAM7
Выйшаў на свабоду 76-гадовы Сямён Добкін, брат заснавальніка EPAM
«На працягу 30 гадоў незалежнасці беларускамоўныя бюлетэні задавальнялі ўсіх». Камуністы абвінавацілі Бондараву ў распальванні варожасці на моўнай глебе1414
Каментары