Польскі часопіс Forbes Women намінаваў беларуску Вольгу Ланеўскую на званне жанчыны года ў катэгорыі «грамадская дзейнасць», піша «Радыё Свабода». Ланеўская працуе з тэмамі фемінізму і супрацьдзеяння гендарнаму гвалту. Яна заснавала ў Кракаве Фемінісцкі цэнтр салідарнасці для дзяўчат і жанчын.
Вольга — сертыфікаваная трэнерка па жаночай самаабароне і асертыўнасці па метадзе WenDo, прыдуманым у Канадзе на мяжы 60—70-х гадоў ХХ стагоддзя.
«Метад уключае ў сябе разуменне і ўмацаванне асабістых межаў, навыкі фізічнай самаабароны, а таксама працу з голасам, упэўненасцю ў сабе і асертыўнасцю у цэлым. Сама назва паходзіць ад слоў woman (па-англійску — жанчына) і do (па-японску — дарога). Можна сказаць, што гэта шлях жанчыны, які кожная з нас выбірае сама, а можна пайсці глыбей і заявіць, што гэта метад барацьбы з дыскрымінацыяй і гвалтам па прыкмеце полу», — тлумачыла сама Вольга Ланеўская ў інтэрв’ю ex-press.live.
Паводле яе, WenDo, з аднаго боку, дапамагае прымаць рашэнні і выходзіць з гвалтоўных адносін і зносін, а з другога — звяртае ўвагу на тое, як не трапляць у такія адносіны і сітуацыі. Таксама WenDo дапамагае лепш пазнаць сябе і давяраць сабе, спраўляцца з пачуццём сораму і бездапаможнасці ў крызісных сітуацыях.
Да пераезду ў Польшчу Вольга Ланеўская праводзіла трэнінгі па метадзе WenDo для беларусак у Беларусі. Заняткі праводзілі бясплатна дзякуючы дапамозе і падтрымцы арганізацыі «Радзіслава», якая дапамагала жанчынам, што пацярпелі ад хатняга гвалту. Пазней улады Беларусі ліквідавалі «Радзіславу» і іншыя арганізацыі дапамогі жанчынам у Беларусі.
Агулам рэдакцыя польскага часопіса Forbes выбрала 50 жанчын, чыя дзейнасць заслугоўвае ўвагі. Яны прадстаўляюць пяць катэгорый: бізнэс, грамадская дзейнасць, культура, навука і спорт. Дапамагаць вызначаць, хто з іх варты звання «Жанчыны года», будуць чытачы.
Цяпер чытаюць
Работнікам Цэнтра алімпійскай падрыхтоўкі па фрыстайле забаранілі ісці на пахаванне Мікалая Казекі15
Работнікам Цэнтра алімпійскай падрыхтоўкі па фрыстайле забаранілі ісці на пахаванне Мікалая Казекі
У Беларусі зацвердзілі правілы эвакуацыі каштоўнасцяў на выпадак вайны: цэглу з Брэсцкай крэпасці з надпісамі будуць ратаваць перш за карціны Шагала і Суціна1515
Каментары