«Педагог-псіхолаг была на працы ў стане алкагольнага ап'янення». У Мінскім раёне выхаванка дзіцячай вёскі скончыла жыццё самагубствам
Трагедыя здарылася восенню 2023 года, дзяўчынцы было 12 гадоў.
Восенню 2023 года адна з выхаванак дзіцячай вёскі ў Мінскім раёне скончыла жыццё самагубствам. У дзень трагедыі педагог-псіхолаг знаходзілася на працы «ў стане алкагольнага ап'янення». Гэтая інфармацыя вынікае з ліста за подпісам намесніка генпракурора Максіма Вароніна віцэ-прэм'еру Ігару Петрышэнку. Дакумент «Люстэрка» атрымала з дапамогай «Белпола».
Трагедыя адбылася ў лістападзе 2023 года, дзяўчынцы на той момант было 12-13 гадоў. Мяркуючы па тэксце ліста, жыццё ў яе складвалася няпроста. Доўгі час яна жыла з маці, якая піла і вяла амаральны лад жыцця. Дачку забралі з сям'і і змясцілі ў Мінскі раённы сацыяльна-педагагічны цэнтр. Аказалася, што там яна наносіла сабе пашкоджанні.
— Педагогам-псіхолагам мерапрыемствы па аказанні псіхалагічнай дапамогі не праводзіліся, дыягнастычныя даследаванні і карэкцыйная праца вяліся нерэгулярна і фармальна, прычыны нанясення самапашкоджанняў не высвятляліся, — адзначыў Максім Варонін і дадаў, што крызісны псіхолаг з падлеткам не працаваў.
У ліпені 2023 года дзяўчынку змясцілі ў дзіцячую вёску «Вытокі», якая знаходзіцца ў Мінскім раёне, і залічылі ў Бараўлянскую СШ № 3. Аднак, як піша намеснік генпракурора, сітуацыя ў падлетка не палепшылася.
— Аказанне кваліфікаванай псіхолага-педагагічнай дапамогі не забяспечана, меры па арганізацыі вольнага часу не прымаліся, — паведаміў Максім Варонін.
У лістападзе 2023 года дзяўчынка скончыла жыццё самагубствам — яна павесілася.
— У дзень гібелі непаўналетняй педагог-псіхолаг знаходзілася на працоўным месцы ў стане алкагольнага ап'янення, — напісаў намеснік генпракурора. — Яна патлумачыла, што ўжывала спіртное ў сувязі з вызваленнем сябра з турмы.
Нагадаем, летам 2024 года Генпракуратура адзначала, што колькасць дзіцячых суіцыдаў расце. У першым паўгоддзі жыццё самагубствам скончылі 18 дзяцей. Гэта на 50% больш, чым за такі ж перыяд 2023 года, калі трагедыя адбылася з 12 непаўналетнімі. Таксама ў ведамстве адзначалі, што хлопцы і дзяўчынкі сталі раней здзяйсняць самагубствы. Напрыклад, двум самым малодшым было ўсяго па 10 гадоў.
Памілаваныя 15 чалавек, сярод якіх 13 палітвязняў15
Каментары
Шкада, што гэтае дзіцё стала чарговай (і на жаль далёка не апошняй) ахвярай антычалавечай лукашысцкай сістэмы.