З 1 чэрвеня ва Узбекістане ўводзіцца спрошчаны парадак атрымання дазволу на жыхарства тэрмінам на пяць гадоў для замежных грамадзян і асоб без грамадзянства. Гэта норма замацавана ў указе прэзідэнта ад 18 красавіка, паведаміла Узбецкая служба Радыё Свабоды са спасылкай на Міністэрства юстыцыі краiны.
Для атрымання дакумента замежніку неабходна ўнесці 200 тысяч даляраў ЗША, а таксама па 100 тысяч даляраў за кожнага члена сям’і — мужа або жонку, дзяцей і бацькоў.
Улады Узбекістана разлічваюць, што праграма прыцягне ў краіну заможных інвестараў, а таксама ўзмоцніць прыток капіталу ў эканоміку. Аналагічныя «залатыя візы» ўжо дзейнічаюць у шэрагу краін, такіх як Партугалія, ААЭ, Канада, ЗША і іншыя. Яны дазваляюць замежнікам атрымаць ДНЖ або грамадзянства ў абмен на інвестыцыі ў эканоміку, нерухомасць або нацыянальныя праекты.
Іншыя краіны Цэнтральнай Азіі «залатую візу» не выдаюць, але ў Казахстане і Кыргызстане прапаноўвалася ўвесці праграмы атрымання ВНЖ за інвестыцыі.
У верасні 2022 года ў Казахстане была прапанавана канцэпцыя «інвестыцыйнай візы» з правам на 10-гадовы від на жыхарства за буйную інвестыцыю ў эканоміку краіны.
У 2023 годзе Жагарку Кенеш (парламент) Кыргызстана адобрыў законапраект аб выдачы «інвестыцыйных віз» тэрмінам ад 5 да 10 гадоў замежным грамадзянам, якія ўклалі ў краіну ад 10 да 20 млн сомаў (115—230 тысяч даляраў па цяперашнім курсе). Аўтары дакумента заявілі, што гэта добрая магчымасць для прадстаўнікоў іншых краін, якія жадаюць пачаць бізнес у краіне. Але эксперты казалі, што для прыцягнення інвестыцый уладам у першую чаргу неабходна зрабіць празрыстай падатковую палітыку і гарантаваць абарону ўласнасці прадпрымальнікаў.
Цяпер чытаюць
Малады работнік «Мінск-Арэны» павінен заплаціць 71 мільён даляраў4
Каментары