З 21 верасня паміж Мінскам і Маладзечнам пачнуць курсіраваць дадатковыя паскораныя электрычкі. Гэта будуць звычайныя рэгіянальныя цягнікі эканом-класа, а не вагоны бізнэс-класа, піша Blizko.by.
Новы цягнік №7041 будзе хадзіць у асобныя дні да 18 кастрычніка. З Мінска ён будзе адпраўляцца ў 9:58 і прыбываць у Маладзечна ў 11:14. У дарозе ён будзе знаходзіцца 1 гадзіну 16 хвілін. Пасля станцыі Ждановічы і да Фестывальнага цягнік не будзе мець ніводнага прамежкавага прыпынку.
Назад цягнік №7042 будзе адпраўляцца з Маладзечна ў 13:52 і прыбываць у Мінск у 15:04. Час у дарозе складзе 1 гадзіну 12 хвілін.
Кошт праезду застанецца такім жа, як у звычайнай электрычцы, — 4 рублі 26 капеек.
Увогуле паскораныя электрычкі паміж Мінскам і Маладзечнам ужо курсіруюць. Напрыклад, цягнікі па маршруце Мінск — Гудагай пасля Ждановічаў прапускаюць амаль усе прыпынкі да Фестывальнага. Дарога ад Мінска да Маладзечна займае ў іх каля 1 гадзіны 19 хвілін.
Звычайныя электрычкі, якія спыняюцца на ўсіх станцыях, едуць паміж Мінскам і Маладзечнам прыкладна 1 гадзіну 47—51 хвіліну.
Новыя цягнікі звязаныя і з будучымі зменамі ў класіфікацыі прыгарадных перавозак. Законапраект аб чыгуначным транспарце прадугледжвае з'яўленне асобнага віду рэгіянальных ліній эканомкласа — паскораных. Цяпер звычайныя электрычкі і дызель-цягнікі ў гэтую катэгорыю ўваходзяць без падзелу на падтыпы.
Мяркуецца, што галоўнае адрозненне паскораных цягнікоў будзе ў меншай колькасці прыпынкаў. Ці будзе ў будучыні праезд у іх даражэйшы за звычайныя электрычкі, пакуль дакладна не вядома.
Паскораныя электрычкі паміж Мінскам і Маладзечнам былі звычайнай з'явай і ў савецкія часы, і ў 1990‑я гады. Некаторыя з іх наогул не спыняліся паміж дзвюма канцавымі станцыямі. Гэта, сярод іншага, выкарыстоўвалі студэнты, якія ехалі без білета: першым месцам, дзе кантралёры маглі высадзіць безбілетніка, была адна з канцавых станцый — Мінск або Маладзечна.
Масквічка распавяла, як разам з жаніхом ледзь не загінула ў аварыі па дарозе на сваё вяселле ў сядзібе пад Лагойскам10
Масквічка распавяла, як разам з жаніхом ледзь не загінула ў аварыі па дарозе на сваё вяселле ў сядзібе пад Лагойскам
«Людзі каментавалі, што сальманела ўвайшла ў чат». Беларус паехаў працаваць у Крэмніевую даліну — і стаў кулінарным блогерам на 28 мільярдаў праглядаў88
Каментары