Да асобага распараджэння сталічная міліцыя будзе несці службу ва ўзмоцненым рэжыме
У сувязі з тэрактамі ў маскоўскім метро, учыненымі раніцай 29 сакавіка, мінская міліцыя да асобага распараджэння будзе несці службу ва ўзмоцненым рэжыме. Пра гэта паведаміў начальнік аддзела інфармацыі і грамадскіх сувязяў ГУУС Мінгарвыканкама Аляксандр Ластоўскі.
У першую чаргу, паводле яго слоў, гэта тычыцца агульнагарадской міліцыі. Аляксандр Ластоўскі звязаў прынятыя меры не толькі з маскоўскімі падзеямі, але і пачаткам правядзення ў горадзе аперацыі «Арсенал» па прадухіленні незаконнага абароту зброі і боепрыпасаў.
Што датычыцца аховы сталічнага метрапалітэна, то, паводле слоў прадстаўніка ГУУС, увесь асабовы склад аддзела ўнутраных спраў па ахове гэтага аб’екта, у тым ліку афіцэры, выведзены на дзяжурства.
Як паведаміў прэс‑сакратар упраўлення ўнутраных спраў на транспарце МУС Беларусі Аляксандр Марчанка, падраздзяленні транспартнай міліцыі таксама будуць пераведзены на ўзмоцнены варыянт нясення службы. Уводзяцца дадатковыя нарады для суправаджэння цягнікоў і аховы аб’ектаў чыгункі, у тым ліку сталічнага чыгуначнага вакзала. Пры нясенні службы будуць актыўна выкарыстоўвацца металадэтэктары.
Цяпер чытаюць
У дзень, калі памілавалі палітвязня Дароніна, ягонай жонцы прысудзілі 8,5 гадоў калоніі за ўдзел у дваровым чаце3
Каментары