Чатыры самалійцы паступілі ў беларускі каледж, але замест вучобы пайшлі нелегальна праз мяжу
Прадстаўнікі ад міліцыі абмеркавалі пытанне высылкі з Рэспублікі Беларусь чатырох грамадзян Самалі у актавай зале Полацкага дзяржаўнага ляснога каледжа, дзе тыя вучыліся. Сустрэчу правялі для таго, каб папярэдзіць іншых навучэнцаў каледжа з далёкіх замежных краін.
У сакавіку гэтага года чатыры самалійцы атрымалі дазвол на часовае пражыванне ў Беларусі для навучання ў каледжы. Аднак замест навучання гэтыя іншаземцы, як сцвярджае міліцыя, спрабавалі выкарыстоўваць тэрыторыю Беларусі для незаконнай міграцыі ў іншыя краіны.
У сувязі з гэтым было прынята рашэнне аб іх высылцы і забароне на ўезд у Беларусь на пяць гадоў.
Начальнік Полацкага РАУС Вячаслаў Пяткун на праведзенай з замежнымі студэнтамі сустрэчы падкрэсліў важнасць пазбягання імі падобных сітуацый, каб працягнуць знаходжанне ў Беларусі. А начальніца аддзялення па грамадзянстве і міграцыі Іна Маскаленка папярэдзіла пра магчымыя крымінальныя наступствы.
Каментары