«Мой тэрмін паўнамоцтваў падыходзіць да канца». Ілан Маск пакідае адміністрацыю Трампа
Мільярдэр і кіраўнік Дэпартамента эфектыўнасці ўрада ЗША (DOGE) Ілан Маск заявіў, што тэрмін яго паўнамоцтваў у амерыканскай адміністрацыі заканчваецца, і падзякаваў прэзідэнту Дональду Трампу, піша Бі-бі-сі.
«Паколькі мой тэрмін паўнамоцтваў у якасці спецыяльнага дзяржаўнага служачага падыходзіць да канца, я хачу падзякаваць прэзідэнту Дональду Трампу за прадстаўленую мне магчымасць скараціць марнатраўныя выдаткі», — напісаў ён у сваёй сацсетцы X.
«Місія DOGE з цягам часу будзе толькі мацнець, бо яна стане ладам жыцця ва ўсіх органах дзяржаўнай улады», — дадаў ён.
Напярэдадні Маск сказаў у інтэрв’ю CBS, што расчараваны «вялікім і прыгожым» законам Трампа па падатках і бюджэце. Па яго меркаванні, закон падрывае намаганні па скарачэнні выдаткаў і прывядзе да росту бюджэтнага дэфіцыту.
Пасля ўступлення Трампа на пасаду Маск быў прызначаны «спецыяльным дзяржаўным служачым», што дазваляла яму працаваць на дзяржаву 130 дзён у год. Калі лічыць ад інаўгурацыі 20 студзеня, то гэты тэрмін заканчваецца ў канцы мая. Белы дом, здаецца, пачаў фармальны працэс звальнення заснавальніка Tesla і SpaceX з пасады дзяржаўнага служачага ў ноч на чацвер.
Reuters паведамляе са спасылкай на крыніцы, што ў Маска не было размовы з Трампам перад абвяшчэннем пра сыход. Пры гэтым, паводле іх даных, рашэнне было прынята «на найвышэйшым узроўні».
Крыніца агенцтва таксама сказала, што сыход Маска «быў хуткі і без цырымоній». У красавіку Маск казаў, што плануе больш працаваць у сваіх кампаніях, а DOGE прысвячаць толькі адзін-два дні на тыдзень. Пазней ён сказаў, што плануе скараціць ахвяраванні на палітычныя праекты.
Маск абвінавачваў укаранёную ў ЗША бюракратыю ў тым, што DOGE не ўдалося дасягнуць усіх сваіх мэтаў, хоць яго аўтарытарны стыль і адсутнасць ведаў пра сучасныя палітычныя працэсы ў Вашынгтоне таксама адыгралі важную ролю.
«Сітуацыя з федэральнай бюракратыяй значна горшая, чым я думаў, — казаў ён. — Я ведаў, што ёсць праблемы, але, мякка кажучы, палепшыць сітуацыю ў Вашынгтоне — гэта вельмі складаная задача».
Маск прызнаваў, што не дасягнуў усіх сваіх мэтаў, нягледзячы на тое, што дзясяткі тысяч чалавек былі звольнены з дзяржаўнай службы, а некалькі агенцтваў і ведамстваў былі скарочаны або зачынены.
«Засяроджуся на працы з ЗША». Ціханоўскі расказаў пра свае палітычныя планы на 2026 год32
Каментары
Што ЧК, што DOGE. Самаўлюбёныя людзі з павярхоўным разуменнем і адсутнасцю адказнасці - гэта можна сказаць і пра бальшавікоў, і пра каманду Трампа.
Маск камандаваў працэсамі ў сваіх фірмах як самадур, у дзяржаве рабіць той ж самае атрымалася складаней. Трамп таксама з бізнесу без правіл, дэвелапер, які звыкся кідаць падрадчыкаў і кліентаў.
Дарэчы, нагода падумаць анархістам і іншым прынцыповым крытыкам дзяржавы: карпарацыі - тыя ж міні/квазі-дзяржавы, і акрамя сапраўдных дзяржаў, іх некаму абмяжоўваць. Зараз наглядны прыклад, што спрабуюць рабіць з дзяржавай босы з карпаратыўным мышленнем.