Ахматавец у Курскай вобласці расстраляў краму з гранатамёта. Z-каналы заклікалі пакараць яго, але позна
Увечары ў панядзелак, 9 чэрвеня, у сеціве з'явілася відэа, на якім расійскі вайсковец страляе з ручнога супрацьтанкавага гранатамёта па будынку ў Суджы Курскай вобласці. Як высветліла «Агенцтва», гэта адбылося пасля таго, як украінцы пакінулі горад. Інцыдэнт выклікаў хвалю крытыкі нават у z-асяроддзі.
На распаўсюджаным відэа мужчына ў ваеннай форме з нашыўкай «ВК» (вайсковая камендатура) цэліцца ў двухпавярховы будынак, робіць стрэл, а затым з усмешкай пазіруе на камеру.
Паводле аналізу «Агенцтва», інцыдэнт адбыўся на вуліцы Карла Маркса ў Суджы.
Z-блог «Romanov Лайт» пазначыў мужчыну як «супрацоўніка камендатуры», удакладніўшы, што відэа было знятае ў чэрвені.
Будынак, які трапіў пад удар, раней належаў прадпрымальніку Ягору Талмачову і функцыянаваў як магазін вокнаў і дзвярэй. Прадпрымальнік адмовіўся ад каментароў.
Але некаторыя блогеры палічылі, што мішэнню была не крама, а царква, у бок якой страляў вайсковец.
Дзеянні вайскоўца выклікалі рэзкую рэакцыю ў расійскіх ваенкараў. «Трынаццаты», які адным з першых апублікаваў відэа, назваў вайскоўца з РПГ «у**ком». А тэлеграм-канал «Ваявода вяшчае» наўпрост звярнуўся да кіраўніка Курскай вобласці Аляксандра Хінштэйна, заклікаючы да дзеянняў.
Прыкладна праз тры гадзіны губернатар Хінштэйн адрэагаваў на відэа, заявіўшы, што на ім — малодшы сяржант 158-й вайсковай камендатуры.
Хінштэйн дадаў, што вайсковец «за свае дзеянні адкажа на іншым судзе», бо ў пачатку чэрвеня «малодшы сяржант загінуў у ДТЗ, уцякаючы ад пераследу Дзяржаўтаінспекцыі».
У сеціве таксама з'явілася відэа з места жудаснага ДТЗ.
Каментары
Церквям не место на нашей земле!Аллах Акбар!