Лукашэнка: Я прачытаў тое, што пісалі ў тыктоках, «тыктокаліся» нашы выкладчыкі
Аляксандр Лукашэнка на цырымоніі ўзнагароджання выпускнікоў і выкладчыкаў ВНУ зноў закрануў тэму тыктоку, піша БелТА.
Гаворачы аб рабоце сістэмы адукацыі, ён расказаў, што некаторыя педагогі скардзяцца ў тыктоку на неабходнасць наведваць вучняў дома або крытычна выказваюцца пра іншыя аспекты работы.
«Я прачытаў тое, што пісалі ў тыктоках, «тыктокаліся» нашы выкладчыкі, настаўнікі. Адзін напісаў, а іншыя рэагуюць: «вось, прымушаюць да вучняў дадому хадзіць, а там алкашы такія-сякія, як туды зойдзеш…», — прывёў адзін з прыкладаў Аляксандр Лукашэнка.
Ён звярнуў увагу, што падобныя наведвання неабходныя ў працы настаўнікаў. Бо для таго, каб паспяхова перадаваць веды, трэба бачыць студэнта, вучня не толькі на лекцыях і ўроках, але і ведаць, якая сітуацыя ў яго дома, ведаць бацькоў.
Лукашэнка закрануў яшчэ адно пытанне запаўнення настаўнікамі разнастайных дакументаў. «Па дакументах рашэнні прыняты ўсе. Таму не выдумляйце нічога на месцах, — падкрэсліў ён. — Калі вас прымушаюць рабіць не тое (што прадугледжана па пасадзе) — вось міністр адукацыі, кіраўнік Адміністрацыі — да яго. Ніякай бюракратыі быць не павінна. Усё павінна быць па-чалавечы і нармальна».
Таксама Лукашэнка заявіў пра неабходнасць абкошвання ўчасткаў каля дома.
«Калі хтосьці не гатовы абкошваць свой участак і пяць метраў суседняга, калі там бабулька… гэта не да мяне. Я гэта не вельмі разумею. Я прэзідэнт, і мне (калі) трэба — абкосяць, але я з касой хаджу і нічога ў гэтым ганебнага не бачу».
«Таму, калі будзеце ў тыктоках чагосьці папісваць, вы памятаеце гэта: усюды патрэбная праца, — падкрэсліў ён. — Вы людзі працавітыя. У Палац Незалежнасці два з паловай дзясяткі ўсяго толькі з мільёнаў трапілі не проста так, а таму што вы і вашы выкладчыкі заслужылі гэта».
Закрануў ён зноў і тэму бульбы.
На яго думку, многім варта было б самастойна высаджваць на прысядзібных участках гэтую культуру, каб потым ранняй вясной не скардзіцца на недахоп бульбы ў крамах.
«Калі я пакрытыкаваў вас за тое, што вы, маючы лецішча, дзве-тры баразёнкі, не высадзілі бульбы і ў вас няма бульбы ў сакавіку месяцы, ну прабачце, — сказаў Аляксандр Лукашэнка.
— Я карыстаюся такім прынцыпам: перш чым у кагосьці камень кінуць або пакрытыкаваць, перад люстэркам устань і паглядзі на сябе. Заўсёды карыстаюся гэтым прынцыпам. На сябе паглядзіце. Глядзіце ў жыцці, што вы зрабілі і што не зрабілі, што вам трэба будзе зрабіць», — сказаў Лукашэнка.
Цяпер чытаюць
18‑гадовы былы палітвязень расказаў, што ён сваяк Ціханоўскай. Яго затрымалі, калі ён ехаў ваяваць за Украіну2
Каментары