«Бітва тытанаў» — грэцка-галівудзкія міфы
Бітва тытанаў (Clash of the Titans)
ЗША — Вялікабрытанія, 2010, каляровы, 3D, 118 хв.
Рэжысёр: Луі Летэр’е
Ролі выконваюць: Сэм Ўортынгтан, Лаям Нісан, Ральф Файнз, Джэйсан Флемінг, Джэма Артэртан, Алекса Давалас
Жанр: Фантастычныя прыгоды паводле грэцкіх міфаў і аднайменнага фільму 1981 году
Адзнака: 5,5 (з 10)
Персей — выхаваны людзьмі сын Зеўса. Але ягоных прыёмных бацькоў забівае Аід. Алімпійскія багі помсцяць людзям за іхнюю абыякавасць і паўстанні. Адмысловая гадасць — Кракен, які мусіць разбурыць горад Аргас і сажраць прынцэсу Андрамеду. Персей выпраўляецца ў небяспечнае вандраванне, каб выратаваць людзей.
Галівудзкія міфатворцы папаўторна звярнуліся да спадчыны старажытнае Грэцыі. Пасля нядаўняга «Персі Джэксана», дзе напаўбог Персей быў падлеткам, на экране больш важкая артылерыя. Спецназавец з «Аватару» Сэм Ўортынгтан б’ецца з Мядузай Гаргонай, вандруе ў пекла, абараняе красуняў (дзве штукі) — і палохае дрэсіраваных скарпіёнаў.
Збольшага карціна ажыўляе вядомы з дзяцінства сюжэт , удала прытарноўваючы яго пад сучасны кінабізнэс. Алімпійскія багі — фальшывыя і падступныя стоды. Мямля Зеўс (Лаям Нісан), попельна-белы Аід (Ральф Файнз), жаночыя боствы з рэкламна-бліскучымі зубкамі.
Людзі ўжо не настолькі пераканаўчыя. Яны, вядома, бунтуюць, і, быццам бы, як грэцкія прататыпы змагаюцца супраць лёсу.
Але не пераймайцеся — гэта бунт за салодкую поліўку і ўласны абагоўлены статус.Хітры Зеўс папярэджвае: цябе, Персей, зробяць богам. І гэта так.
Сэму Ўортынгтану самы час апраўдацца за кашэча-фіялетавую Пандору — і даказаць, што ён чалавек — на галівудзкім Алімпе.
Цяпер чытаюць
Каля плошчы Бангалор у Мінску вырас яшчэ адзін звышсакрэтны аб’ект18
Каля плошчы Бангалор у Мінску вырас яшчэ адзін звышсакрэтны аб’ект
«Калі б я быў следчым КДБ, я б падкрэсліў тое самае». Фядута — пра схаваныя сэнсы «Каласоў пад сярпом тваім», увагу сілавікоў да свайго рукапісу і загадку з трэцяй часткай рамана Караткевіча1212
Каментары