Доктар Аўтахаус

Узаконеныя перакупшчыкі з радасцю забяруць ваш аўтамабіль для продажу. Што ўзамен — толькі грошы ці клопат у дадатак?

Такім словам называюць любую краму, якая прадае машыны. Мы ж спынімся на «аўтахаусах» у больш вузкім значэнні слова — гэта кампаніі, якія працуюць не з новымі аўто, а з былымі ў карыстанні. Напрыклад, бяруць іх на камісію для продажу ці прывозяць старыя машыны з Еўропы і Амерыкі.

Няскончаная прыступка да цывілізацыі

У Беларусі працуе дзясятак такіх крам. Асноўныя — «Аўтаподыум», «4 колы», «Мегаполіс», «MyCar». Іх можна было б назваць чарговай прыступкай на шляху да цывілізаванага рынку — прынамсі тыя, што знаходзяцца пад дахам і маюць у штаце кваліфікаваных кансультантаў. Але гэта ідэальны варыянт.

Пакуль жа сітуацыя на аўтарынку Беларусі сведчыць пра адваротнае. Водгукі ў інтэрнэце — спрэс адмоўныя. Некаторыя пакрыўджаныя даходзяць да абароны сваіх правоў. У Беларускім таварыстве спажыўцоў сабраўся стос прэтэнзій да аўтахаусаў. Яшчэ больш людзей нават не пачынаюць папяровую цяганіну.

«На адной машыне мне падрапалі бампер, на другой я знайшоў расколіну лабавога шкла па ўсёй даўжыні знізу. Гэта яны свае аб’явы з цаной палівалі ў маразы кіпнем, каб не трэба было адскрабаць… І ні за адну з сітуацый не заплацілі, маўляў, вы ж нічога не дакажаце. Уладальнік аўтахауса — былы перакупшчык з Малінаўкі, таму і стаўленне да кліентаў у яго адпаведнае», — расказвае адзін з тых, каму не пашчасціла звярнуцца ў аўтахаус.

Дый ашчадзіць, купляючы машыну ў аўтахаусе, складана. Аўто каштуюць столькі ж, колькі на рынку, ці нават даражэй. Накрутка ёсць, а гарантыі — няма. Гарантыю на некалькі месяцаў можна атрымаць на лічаныя аўто — і тое толькі пры праходжанні тэхагляду і рамонту за дадатковыя грошы.

Галоўнае — збыць

Калі паглядзець на з’яву з іншага боку, з боку прадаўцоў, атрымліваецца больш аптымістычная карціна. Прадаць свой аўтамабіль аўтахаусу і атрымаць 70—80% ад рынкавай цаны за пару дзён — даволі выгадны варыянт, калі падціскае час. Папулярную машыну ўвогуле адарвуць з рукамі. Калі ў машыне ёсць хібы, цана ўпадзе яшчэ ніжэй, праўда, для наступнага пакупніка аўто будзе хутчэй за ўсё прадавацца як беспраблемнае.

Аўтахаус — яшчэ і выйсце для тых, хто перадусім цэніць свой час, а не грошы. Аднойчы выставіўшы сваё аўто на продаж, пра яго можна часова забыцца. Машына можа стаяць на продажы і месяц, і два, пакуль яе нарэшце не знойдзе новы гаспадар.

Атрымліваецца, што аўтахаусы выгадныя для тых, хто хоча прадаць, а не купіць.

Яўген Васількоў

Плюсы аўтахаусаў

+ Перакладванне са сваіх плячэй працы па пошуку купца
+ Магчымасць тэрмінова атрымаць 80% ад рынкавай цаны машыны
+ Магчымасць уліку старога аўто ў кошт новага
+ Магчымасць купіць аўто ў крэдыт

Мінусы аўтахаусаў

— Уласніку выплачваецца заніжаная цана машыны
— Складана збыць аўтахаусу праблемны аўтамабіль
— Аўтахаус не адказвае за нанесеныя машыне пашкоджанні на стаянцы.

• 0
• 0
• 0
• 0
• 0
• 0
• 0
• 0