«Дзяруць курэй і гусей». Вёску ў Клецкім раёне тэрарызуюць сабакі, але ЖКГ кажа, што яны занадта хітрыя
Жыхарка вёскі Кухчыцы запісала ў сацсетках крык душы і абвінаваціла камунальшчыкаў у бяздзеянні. Тыя скардзяцца, што сабакі занадта хітрыя. І кажуць, што нічога кампенсаваць не будуць.
Жыхарка аграгарадка Кухчыцы Клецкага раёна ў інстаграме паскардзілася на бадзяжных сабак, якія тэрарызуюць вёску. Паводле яе слоў, зграя сабак дзейнічае ў Кухчыцах ужо больш за два тыдні.
Блогер сцвярджае, што ў яе маці сабакі разадралі восем курэй і трох куранят. Жанчына патэлефанавала ў ЖКГ. Там без асаблівай зацікаўленасці сказалі, што пра праблему ведаюць і ўжо быццам злавілі аднаго сабаку. Але такія адносіны маці блогера не спадабаліся.
«Няўжо ў нас няма дзяжурнай службы? Тым больш што ўжо два тыдні сабакі змятаюць усё на сваім шляху. Як так можна?! Проста абыякава ставіцца да чужой працы. Гэта ж каштуе грошай. Зерне, камбікорм, гэта ж трэба курэй вырасціць. Скажыце, хто гэта ўсё кампенсуе? Тым больш што больш за два тыдні вам паступаюць скаргі. Чаму ў нас так адбываецца?» — абуралася жанчына.
У ЖКГ патлумачылі, што пра сітуацыю ў курсе. Паводле прадстаўнікоў камунальнага прадпрыемства, праблема з бадзяжнымі сабакамі ў Кухчыцах вядомая, прынятыя меры для яе вырашэння. У прыватнасці, праводзяцца рэгулярныя рэйды па пошуку безнаглядных жывёл, піша «Мінская праўда».
«Рэйды па вылоўліванні безнаглядных жывёл праводзяцца ў Кухчыцах на рэгулярнай аснове. Мы ўсё кантралюем. Сёння зноў паедзем туды», — патлумачыў дырэктар прадпрыемства.
Пры гэтым у ЖКГ скардзяцца, што злавіць сабак не так проста з-за асаблівасцяў мясцовасці і паводзін жывёл. Сабакі проста не сядзяць на месцы і не чакаюць, пакуль вылаў па іх прыедзе. Сабакі хаваюцца, перамяшчаюцца, і гэта перашкаджае працы службы.
Кампенсацыю за забітых курэй камунальнікі плаціць не збіраюцца. Яны заявілі, што за бяспеку падворка адказвае ўласнік, а не ЖКГ.
Каментары