Экс-прэзідэнту Філіпін Радрыга Дутэртэ выстаўленыя абвінавачванні ў злачынствах супраць чалавечнасці
Пракуроры Міжнароднага крымінальнага суда выставілі былому прэзідэнту Філіпін Радрыга Дутэртэ абвінавачанні па трох пунктах у злачынствах супраць чалавечнасці. Паводле іх даных, ён можа быць датычны прынамсі да 76 забойстваў, здзейсненых падчас абвешчанай уладамі вайны з нарказлачыннасцю.
Моцна адрэдагаваны абвінаваўчы акт, які датуецца 4 ліпеня, быў апублікаваны ў панядзелак. Былы філіпінскі лідар з сакавіка знаходзіцца пад вартай у следчым ізалятары МКС у Гаазе, піша Бі-бі-сі.
Першы пункт тычыцца яго меркаванага саўдзелу ў 19 забойствах, здзейсненых з 2013 па 2016 год, калі Дутэртэ быў мэрам горада Даваа.
У другім пункце ідзе гаворка аб 14 забойствах так званых высокапастаўленых мэтаў у 2016 і 2017 гадах, калі Дутэртэ займаў пасаду прэзідэнта.
Трэцяе абвінавачанне тычыцца 43 забойстваў, здзейсненых у ходзе аперацый супраць падазраваных ва ўжыванні наркотыкаў і наркагандлі. Па дадзеных МУС, гэтыя забойствы былі здзейснены на тэрыторыі Філіпін з 2016 па 2018 год.
«Фактычны маштаб віктымізацыі на працягу перыяду, які ахопліваецца абвінавачаннем, быў значна большы, пра што сведчыць шырокамаштабны характар нападаў», — заявілі пракуроры МКС.
Па даных праваабаронцаў, у абвешчанай Дутэртэ вайне з наркотыкамі, у тым ліку ў выніку пазасудовых распраў, маглі загінуць тысячы людзей.
Сам экс-прэзідэнт заяўляў, што змагаўся з наркагандлярамі, каб пазбавіць краіну ад вулічнай злачыннасці.
У ордары на арышт Дутэртэ, выдадзеным 7 сакавіка, утрымлівалася адно абвінавачанне ў злачынствах супраць чалавецтва ў сувязі з 43 меркаванымі забойствамі.
Дутэртэ, арыштаваны ў сакавіку пасля прызямлення ў міжнародным аэрапорце Манілы па ордары Міжнароднага крымінальнага суда, стаў першым уплывовым палітыкам за апошнія тры гады, якога даставілі ў Гаагу.
Раней адвакат экс-прэзідэнта Нікалас Каўфман заявіў, што яго кліент не можа паўстаць перад судом у сувязі са станам здароўя, і заклікаў МУС адкласці разгляд на нявызначаны тэрмін.
У маі былы прэзідэнт быў зноў абраны мэрам Даваа, нягледзячы на тое, што знаходзіцца пад арыштам. Яго сын Себасцьян, які займаў пасаду мэра з 2022 года, працягвае выконваць абавязкі замест бацькі.
Прыхільнікі Дутэртэ сцвярджаюць, што МКС выкарыстоўваецца ў якасці палітычнага інструмента цяперашнім прэзідэнтам краіны Фердынандам Маркасам, які публічна пасварыўся з уплывовай сям'ёй Дутэртэ. Улады краіны гэта адмаўлялі.
Цяпер чытаюць
Былы беларускі міліцыянер шукае «пародзістую прыгажуню». Называе сябе мільянерам, а сам судзіцца з былой жонкай за аліменты1
Каментары