Вялікі тэатр Беларусі паведаміў пра смерць салісткі оперы, лаўрэаткі Міжнароднага конкурсу Ганны Гур'евай. Ёй было 60 гадоў.
Салісткай беларускага Вялікага тэатра Ганна Гур'ева стала ў 1994 годзе, пасля заканчэння Адэскай дзяржаўнай кансерваторыі. На сцэне тэатра яна выканала больш за тры дзясяткі партый: ад Джыльды, Марфы і Паміны да Мюзеты, Сюзаны, Разіны, ад класічных опер да сучасных пастановак і спектакляў для дзяцей.
Асаблівае месца ў творчым жыцці Ганны Гур'евай займалі камерныя канцэрты: спявачка была пастаяннай удзельніцай музычных вечароў у камернай зале імя Ларысы Александроўскай.
З трупай тэатра гастралявала ў Аўстрыі, Бразіліі, Германіі, Польшчы, на Кіпры.
За выдатныя творчыя дасягненні і значны ўклад у развіццё беларускага музычнага мастацтва ў 2008 годзе ўзнагароджаная Ганаровай граматай Савета Міністраў Рэспублікі Беларусь.
Каментары