Суд у Гаазе прызнаў вінаватым у ваенных злачынствах у Дарфуры колішняга лідара суданскага апалчэння
Міжнародны крымінальны суд у Гаазе прызнаў вінаватым у ваенных злачынствах і злачынствах супраць чалавечнасці суданскага палявога камандзіра Алі Мухамада Алі Абд-аль-Рахмана, вядомага таксама як Алі Кушэйб, піша Бі-бі-сі.
Алі Мухамад Алі Абд-аль-Рахман узначальваў узброенае апалчэнне «Джанджавід», якое дзейнічала пры падтрымцы ўладаў Судана і праводзіла рэпрэсіўныя дзеянні ў рэгіёне Дарфур у 2003—2004 гадах. Пад яго кіраўніцтвам групоўка здзяйсняла масавыя забойствы, катаванні, знішчэнне вёсак і гвалтоўныя дзеянні, у выніку якіх загінулі сотні тысяч чалавек, а мільёны былі вымушаныя ўцякаць са сваіх дамоў.
Суд прызнаў, што Абд-аль-Рахман асабіста ўдзельнічаў у злачынствах — аддаваў загады на расстрэлы, удзельнічаў у збіцці людзей і назіраў за пакараннямі. У адным з апісаных эпізодаў ён прымусіў каля 50 мірных жыхароў легчы на зямлю і загадаў сваім байцам расстраляць іх.
Падчас судовага працэсу сведкі расказвалі, як іх вёскі былі спаленыя, мужчыны і хлопчыкі забітыя, а жанчыны — адпраўленыя ў сэксуальнае рабства.
Абд-аль-Рахман, які нарадзіўся прыкладна ў 1949 годзе, адмаўляў усе абвінавачанні, сцвярджаючы, што яго блытаюць з іншым чалавекам. Аднак суд палічыў доказы дастатковымі, каб прызнаць яго сапраўдным Алі Кушэйбам.
Ён стаў першым чалавекам, якога Міжнародны крымінальны суд асудзіў за злачынствы, здзейсненыя ў Дарфуры.
Пры гэтым адзначаецца, што ён быў паплечнікам былога кіраўніка Судана Амара аль-Башыра, якога таксама шукае Міжнародны крымінальны суд па абвінавачаннях у генацыдзе. Аль-Башыр быў зрынуты ў 2019 годзе, але да гэтага часу не перададзены ў Гаагу.
Канфлікт у Дарфуры пачаўся тады, калі неарабскія плямёны з гэтага рэгіёна паўсталі супраць дыскрымінацыі з боку ўрада, а ўлады ў адказ накіравалі супраць іх «Джанджавід». Паводле ацэнак ААН, у гэтым узброеным канфлікце загінулі каля 300 тысяч чалавек, а больш за два мільёны сталі ўцекачамі.
Канчатковы прысуд па справе Абд-аль-Рахмана будзе абвешчаны пазней.
Былога вайскоўца з Брэста, які вярнуўся з Польшчы, абвінавацілі ў «тэрарызме» і адправілі ў калонію6
Каментары