У Расіі заблакавалі інтэрнэт-роўмінг для беларусаў праз страх перад украінскімі дронамі. Ці дапаможа?
З 6 кастрычніка беларусы, што ўязджаюць у Расію, сутыкнуліся там з новымі абмежаваннямі: у першыя суткі пасля падключэння да расійскай мабільнай сеткі ў іх не працуе мабільны інтэрнэт і SMS. Такую блакіроўку ўвялі расійскія аператары па распараджэнні ўладаў, не папярэдзіўшы беларускі бок.
Званкі пры гэтым застаюцца даступнымі, але праз 24 гадзіны інтэрнэт зноў уключаецца. Калі пасля гэтага SIM-карта не праяўляе актыўнасці тры дні, блакіроўку зноў уключаць на суткі.
Прычына абмежавання — барацьба з дронамі, што могуць выкарыстоўваць SIM-карты для сувязі з інтэрнэтам і навядзення на цэлі.
У жніўні расійскі міністр лічбавага развіцця Максут Шадаеў пацвердзіў, што гэтыя захады накіраваныя на супрацьдзеянне беспілотнікам з замежнымі SIM-картамі. Эксперты адзначаюць, што частка баявых дронаў сапраўды мае мабільныя модулі, хаця некаторыя выкарыстоўваюць іншыя каналы сувязі.
Версію з процідзеяннем беспілотнікам пацвярджалі эксперты, у тым ліку генеральны дырэктар кампаніі «Флай Дрон», нагадвае «Флагшток». Ён адзначаў, што многія баявыя дроны, якія запускаюцца на далёкія адлегласці, маюць сім-карты. Яны ўшыты ў блок кіравання для падлучэння да інтэрнэту і ручнога навядзення на цэль у фінальнай фазе палёту, якая можа складаць ад некалькіх дзясяткаў кіламетраў да некалькіх метраў.
Але эксперт нагадваў, што не ўсе дроны выкарыстоўваюць замежныя сім-карты: у некаторыя ставяць расійскія сім-карты, а іншыя могуць кіравацца па радыёканале, спадарожніку або працаваць на аўтапілоце.
Раней у РФ уводзілі адключэнне мабільнага інтэрнэту пры ўкраінскіх атаках.
Наколькі дзейснай будзе новая мера — пакуль незразумела. Але вядома, што ўжо пасля блакавання, у ноч 7 кастрычніка, Украіна здзейсніла налёт амаль 200 дронаў на РФ: выбухі былі чутныя ў Ніжнім Ноўгарадзе, Белгарадзе і Яраслаўлі.
Цяпер чытаюць
«Больш за 10 чалавек выехалі ў Еўропу — і гэта толькі з майго аддзялення». Рэаніматолаг з райцэнтра шчыра апісаў будні беларускай медыцыны4
Каментары