Беларусам, якія прыедуць у Расію, будуць на першыя суткі адключаць інтэрнэт
Беларусы, якія выязджаюць у Расію, сутыкнуцца з часовым адключэннем мабільнага інтэрнэту і SMS у роўмінгу. Пра гэта 6 кастрычніка 2025 года паведамілі ўсе тры беларускія аператары — А1, МТС і life:).
Як паведамляецца, расійскія мабільныя аператары па патрабаванні дзяржаўных органаў пачалі блакаваць замежныя SIM-карткі на 24 гадзіны пасля іх рэгістрацыі ў сетцы. Пад забарону трапляюць паслугі перадачы даных — інтэрнэт і SMS, галасавыя званкі пакуль застаюцца даступнымі.
Праз суткі знаходжання ў Расіі блакіроўка здымаецца, аднак калі SIM-картка пасля таго не будзе выкарыстоўвацца тры дні, то працэдура паўторыцца — яе зноў адключаць на 24 гадзіны.
Аператар А1 адзначыў, што не быў загадзя папярэджаны пра гэтыя новаўвядзенні і раіць сваім кліентам, калі магчыма, скарыстацца для выхаду ў інтэрнэт Wi-Fi-сеткамі.
Аднак, паводле паведамлення расійскага Telegram-канала Mobile-Review.com, карыстальнікі могуць сутыкнуцца з праблемамі пры аўтарызацыі і ў Wi-Fi-сетках, бо ў Расіі для гэтага часта выкарыстоўваюцца аўтаматычныя тэлефонныя званкі (робаты), якія цяпер таксама могуць быць заблакаваныя.
Ідэю ўвесці такі «перыяд астуджэння» для замежных SIM-картак у жніўні гэтага года выказваў міністр лічбавага развіцця, сувязі і масавых камунікацый Расіі Максут Шадаеў. Ён заявіў, што гэта мера патрэбная «для барацьбы з SIM-картамі, якія выкарыстоўваюцца ў дронах».
Цяпер чытаюць
«Наіўна спадзяваліся зарабляць у Еўропах, прыязджаць дадому лячыць зубы на халяву і здаваць кватэру». Прапаганда пачала апраўдваць дарагія жыроўкі для «дармаедаў»2222
Каментары