Улады Славакіі вырашылі змагацца з аварыйнасцю на тратуарах — цяпер там нельга будзе рухацца хутчэй за 6 кіламетраў у гадзіну. Закон выклікаў бурлівае абмеркаванне і шмат жартаў у сетках, і прымусіў паліцыю даваць тлумачэнні. Лягчэй ад гэтага не стала.
Як паведамляе Politico, парламент Славакіі прыняў адпаведную папраўку да закона аб дарожным руху, якая зацвярджае максімальна дапушчальную хуткасць на тратуарах у населеных пунктах — 6 кіламетраў за гадзіну.
Згодна з першапачатковай фармулёўкай, ліміт тычыўся пешаходаў, веласіпедыстаў, скейтбардыстаў, а таксама карыстальнікаў самакатаў і электрасамакатаў. Паводле тлумачэнняў уладаў, мера закліканая прадухіліць сутыкненні паміж пешаходамі і тымі, хто карыстаецца лёгкім транспартам.
Аднак ініцыятыва выклікала шквал жартаў у інтэрнэце — людзі цікавіліся, напрыклад, ці аштрафуюць іх, калі яны пабягуць за аўтобусам.
У выніку паліцыя вымушаная была ўдакладніць: пешаходаў закон не датычыць. Віцэ-прэзідэнт паліцыі Расціслаў Полакавіч паведаміў, што правіла распаўсюджваецца выключна на тых, хто карыстаецца ролікамі, самакатамі, скейтбордамі, лыжамі ды падобнымі сродкамі, а таксама на дзяцей да 10 гадоў на роварах разам з дарослымі.
Аўтар папраўкі, Любамір Важны з левапапулісцкай партыі «Кірунак — Сацыяльная Дэмакратыя» (частка кіруючай кааліцыі прэм’ер-міністра Роберта Фіца), падкрэсліў, што галоўная мэта — павысіць бяспеку на тратуарах, зважаючы на рост колькасці сутыкненняў з удзелам самакатчыкаў.
Палітык лічыць, што папраўка будзе карыснай для доказу парушэнняў, бо дазволіць «аб'ектыўна вызначыць, ці рухаліся яны хутчэй, чым дапушчальна ў зонах, прызначаных у першую чаргу для пешаходаў».
Нягледзячы на гэта, апазіцыя крытыкуе папраўку. Паводле Марцінa Пекaра з партыі «Прагрэсіўная Славакія», небяспеку для пешаходаў ствараюць не самакаты, а аўтамабілі.
«Калі хочам менш аварый, трэба будаваць веладарожкі, а не ўводзіць абсурдныя абмежаванні, якія фізічна немагчыма выканаць. На згаданай хуткасці веласіпедыст ледзь можа ўтрымаць раўнавагу», — заявіў ён.
Пакуль што не зразумела, як улады збіраюцца кантраляваць выкананне гэтай нормы пасля яе ўступлення ў сілу 1 студзеня 2026 года.
Цяпер чытаюць
«Дагэтуль задаюся пытаннем, чым Пратасевіч мяне зачараваў». Вялікае інтэрв'ю Соф'і Сапегі — частка другая2
Каментары
Как там, кстати, нерушимый блок литовских социал-демократов и "Зари над Неманом"?