Пяскоў панаракаў, што Расія і ЗША не выкарыстоўваюць «бліскучыя перспектывы» супрацоўніцтва, а Еўропа чамусьці ўзбройваецца
Расія спадзяецца, што Трамп па-ранейшаму гатовы садзейнічаць дыпламатычнаму ўрэгуляванню ўкраінскага крызісу. Пра гэта прэс-сакратар прэзідэнта Расіі Дзмітрый Пяскоў паведаміў у каментары тэлеканалу CNN.
«Мы павінны палепшыць нашы двухбаковыя адносіны… Мы павінны адкрыць новыя магчымасці для гандлю і эканамічнага супрацоўніцтва», — адзначыў Дзмітрый Пяскоў.
Ён дадаў, што ў адносінах дзвюх краін, маўляў, «бліскучыя перспектывы», аднак бакі, нягледзячы на гэта, пакуль толькі губляюць час і грошы.
Перад гэтым Дзмітрый Пяскоў у інтэрв'ю прапагандысту Аляксандру Юнашаву заявіў, што бачанне Масквы супадае з меркаваннем Прэзідэнта Сербіі Аляксандра Вучыча: у еўрапейскіх краінах, маўляў, назіраюцца моцныя «прамілітарысцкія настроі». Ён адзначыў, што ў шэрагу краін па незразумелых прычынах раптам павялічыліся вайсковыя бюджэты.
На думку пуцінскага прэс-сакратара, такі падыход прынясе Еўрасаюзу больш шкоды, чым карысці. Гэта, маўляў, «вядзе да перанапружання эканомікі і выкліча потым у сярэднетэрміновай перспектыве больш цяжкія наступствы».
Што да Масквы, то яна нібыта заўсёды разумела, што такая небяспека існуе, таму «ўсе меры для забеспячэння сваіх інтарэсаў і бяспекі прымаліся загадзя».
Цяпер чытаюць
«Мае спінагрызы са мной». Ціханоўская расказала, што ўжо выбірае для дзяцей школу ў Варшаве12
Каментары