Дар’я Шманай двойчы трапляла ў аварыі ў Маскве на чужым «Мерсэдэсе»
У абодвух выпадках вінаватай у здарэннях была прызнана менавіта яна — дарадца-пасланнік пасольства Беларусь у Расіі і фаварытка Аляксандра Лукашэнкі.
Удзельніца знакамітага «кавуновага батальёна» Аляксандра Лукашэнкі і пераможца конкурсу «Каралева Вясны — 2013» Дар’я Шманай пераехала ў Маскву ў 2020 годзе. Там яна атрымала пасаду дарадцы-пасланніка ў беларускім дыпламатычным прадстаўніцтве.
У нядаўнім інтэрв’ю Шманай адзначала: «У Маскве паток раніцай нясе цябе на працу, увечары — дадому». Як вынікае з базы аварый, якую хакеры выклалі ў інтэрнэт, па расійскай сталіцы яе «нясе» не грамадскі транспарт, а цёмна-сіні Mercedes-Benz GLC 300 4Matic 2021 года выпуску.
Гэта адзін з самых папулярных гарадскіх красовераў прэміум-класа. Мадэль лічыцца ідэальнай для мегаполіса дзякуючы высокай пасадцы, камфортнай падвесцы і добрай шумаізаляцыі. Пад капотам версіі GLC 300 — двухлітровы бензінавы турбаматор у пары з 9‑ступеньчатай аўтаматычнай каробкай перадач. Штатны поўны прывад 4MATIC дазваляе ўпэўнена адчуваць сябе як на мокрым асфальце, так і ў зімовай кашы, а разгон да 100 км/г займае ўсяго каля 6,5 секунды.
У 2021 годзе такі новы аўтамабіль каштаваў у салоне больш за $80 тысяч па тагачасным курсе. Пасля чатырохгадовага карыстання такая мадэль ацэньваецца ў салідныя $68 тысяч.
Аўтамабіль належыць не Шманай. Першай гаспадыняй «Мерсэдэса» пазначана Юлія Палішчук, а праз год права ўласнасці перайшло Вользе Давыдзенка. Аднак ездзіць на машыне менавіта Шманай.
У базе аварый утрымліваецца інфармацыя пра два дарожна-транспартныя здарэнні з удзелам гэтага аўто — і ў абодвух выпадках за рулём знаходзілася менавіта беларуска. І тады, і тады яе прызналі адзінай вінаватай у аварыі.
Першы інцыдэнт адбыўся 22 жніўня 2021 года. Характэрна, што аўтамабіль на той момант быў абсалютна новы, яго забралі з салона менш за месяц таму. А калі праз тры тыдні пасля аварыі машыну здалі ў рамонт, яе прабег складаў мізерныя 435 кіламетраў.
ДТЗ, у якое трапіла Шманай, прывяло да пашкоджання багажніка. Згодна з данымі сэрвіснага цэнтра, удар не быў крытычным: замест поўнай замены дарагой дэталі майстры прынялі рашэнне аднавіць «родныя» дзверы задка. Рамонт быў аплачаны страхавой кампаніяй.
Другі раз дарадца-пасланнік беларускага пасольства трапіла ў аварыю 29 чэрвеня 2023 года. Наколькі сур'ёзна была пашкоджана машына ў гэтым ДТЗ, невядома. Але і тут іншых вінаватых і пацярпелых не было, Шманай разбіла машыну сама.
«Наша Нiва» — бастыён беларушчыны
ПАДТРЫМАЦЬЦяпер чытаюць
Што вядома пра затрыманых радыёаматараў, якім пагражае аж да расстрэлу15
Каментары