Арганізацыя Дагавора аб калектыўнай бяспецы (АДКБ) заклікае ўсе краіны, якія валодаюць ядзернай зброяй, далучыцца да намаганняў Расіі і ЗША і больш актыўна рабіць свой унёсак у раззбраенчы працэс. Пра гэта гаворыцца ў сумеснай заяве дзяржаў — членаў АДКБ па выніках нефармальнага саміта, які прайшоў 8 мая ў падмаскоўнай рэзідэнцыі «Горкі».
Удзельнікі саміта віталі падпісанне дагавора паміж РФ і ЗША аб мерах па далейшым скарачэнні і абмежаванні стратэгічных наступальных узбраенняў і адзначылі прынцыповае значэнне замацавання ў дакуменце ўзаемасувязі паміж стратэгічнымі наступальнымі і стратэгічнымі абарончымі ўзбраеннямі.
«Дзяржавы — члены АДКБ разглядаюць гэтае пагадненне як важны элемент архітэктуры міжнароднай бяспекі, які адлюстроўвае істотны ўнёсак Расіі і ЗША ў справу ядзернага раззбраення і нераспаўсюджвання», — гаворыцца ў заяве.
У дакуменце зазначаецца, што новы дагавор замяняе адно са значных у гісторыі пагадненняў у сферы раззбраення — дагавор паміж СССР і ЗША аб скарачэнні і абмежаванні стратэгічных наступальных узбраенняў ад 1991 года (ДСНВ).
Лідэры краін АДКБ адзначылі, што разам з РФ і ЗША ўдзельнікамі ДСНВ з’яўляліся Беларусь, Казахстан і Украіна.
«Гістарычная роля згаданага дагавора была б няпоўнай без значных намаганняў па яго рэалізацыі, прынятых гэтымі дзяржавамі», — зазначаецца ў дакуменце.
У заяве гаворыцца, што добраахвотная адмова Беларусі, Казахстана і Украіны ад ядзернай зброі і далучэнні да Дагавора аб нераспаўсюджанні ядзернай зброі ў якасці дзяржаў, якія не валодаюць ядзернай зброяй, дабратворна адбіліся на стратэгічнай стабільнасці ў цэлым.
У дакуменце падкрэсліваецца важнасць пацвярджэння РФ і ЗША гарантый бяспекі Беларусі, Казахстану і Украіне.
Каментары