Днём 2 красавіка пад мастом цераз раку Бярэзіна школьнікі наткнуліся на жудасную знаходку — цела мужчыны ў крыві.
На месца здарэння выехала следча-аператыўная група і супрацоўнікі крыміналістычнага аддзела УСК па Магілёўскай вобласці. Усе рэчавыя доказы сведчылі пра крымінальны характар — па факце забойства 51‑гадовага бабруйчаніна была заведзена крымінальная справа. Дзякуючы камерам відэаназірання супрацоўнікам міліцыі ўдалося выйсці на след двух 16‑гадовых мясцовых жыхароў, якія ўчынілі жорсткую расправу, паведамляе Дзяржкамітэт судовых экспертыз.
Вечарам 31 сакавіка двое сяброў — навучэнцы каледжаў — прыехалі сюды пазаймацца спарынгам на нажах. У пэўны момант іх увагу прыцягнуў мужчына, які знаходзіўся пад мостам. Падышоўшы бліжэй, яны зразумелі, што перад імі таксікаман.
Адзін з хлопцаў прапанаваў другому разабрацца з мужчынам і дастаў з адзення кішэнны нож. Юнакі нанеслі пацярпеламу некалькі ўдараў нажамі, збілі яго і, кінуўшы, пайшлі. Па дарозе яны пазбавіліся сваіх нажоў, выкінуўшы іх у раку. А пасля раз’ехаліся па дамах і, нібы нічога не здарылася, на наступны дзень выйшлі на заняткі.
Адзін з абвінавачаных цалкам прызнаў віну і раскаяўся, другі ж у ходзе следства і ў судовым пасяджэнні сваю датычнасць адмаўляў.
Хлопцы ніколі не мелі праблем з законам. Яны мелі сярэднюю паспяховасць і вялі здаровы лад жыцця.
Ад аднакласнікаў, аднакурснікаў і педагогаў характарызуюцца станоўча.
У Дзяржаўным камітэце судовых экспертыз па дадзенай справе праведзены шэраг судовых экспертыз. Паводле вынікаў судова-медыцынскай экспертызы на целе загінулага выяўлены шматлікія колата-рэзаныя раны правай паловы грудной клеткі, шыі і галавы з пашкоджаннем унутраных органаў, дзіркавы пералом правай цемянной косткі, рэзаная рана пальца правай кісці, якія маглі ўтварыцца ў выніку не менш чым 19 траўматычных уздзеянняў. Непасрэднай прычынай смерці стала масіўная страта крыві.
Таксама судовыя эксперты выявілі, што біялагічны матэрыял з крывёй, выяўлены ў плямах на вопратцы і абутку аднаго з абвінавачаных, з высокай ступенню верагоднасці можа належаць пацярпеламу. След ад абутку, знойдзены падчас агляду месца здарэння, пакінуў красовак.
У дачыненні да абвінавачаных былі праведзены судова-псіхіятрычныя экспертызы. Згодна з заключэннямі экспертаў, падлеткі маглі ўсведамляць грамадскую небяспеку сваіх дзеянняў і кіраваць імі.
На падставе сабраных па справе доказаў 16‑гадовым жыхарам Бабруйска выстаўлена абвінавачанне па п.п. 6, 13, 15 ч. 2 арт. 139 (наўмыснае супрацьпраўнае пазбаўленне жыцця іншага чалавека групай асоб з хуліганскіх меркаванняў, учыненае з асаблівай жорсткасцю).
Судовая калегія па крымінальных справах Магілёўскага абласнога суда прысудзіла ім пазбаўленне волі на тэрмін 10 і 9 гадоў з адбываннем пакарання ў выхаваўчай калоніі.
Прысуд не ўступіў у законную сілу і можа быць абскарджаны і апратэставаны.
Цяпер чытаюць
«Спасибо, Лена! Продолжайте вести наблюдение». Афіцэр, які пісаў Харысавай, пасвіўся ў чатах палітэміграцыі, а некаторым дзяўчатам нават прапаноўваў абмяняцца нюдсамі9191
Каментары