На 10 гадоў асудзілі мінчука за ДТЗ, у якім загінулі чатыры чалавекі
Суд Мінскага раёна вынес прысуд вінаватаму ў аварыі, у якой загінула сям’я з Расіі. Яму прызначана пакаранне ў выглядзе пазбаўлення волі на максімальны тэрмін, прадугледжаны санкцыяй артыкула, — 10 гадоў калоніі агульнага рэжыму.
Таксама яго на 8 гадоў пазбавілі права займацца дзейнасцю, звязанай з кіраваннем транспартнымі сродкамі. Пра гэта ў эфіры тэлеканала АНТ распавяла дзяржаўная абвінаваўца Генеральнай пракуратуры Таццяна Гракун.
Смяротная аварыя адбылася ў канцы чэрвеня. П’яны кіроўца на Mercedes-Benz на вялікай хуткасці зачапіў спадарожнае таксі, якое адкінула на дарожную агароджу. Пасажыры — расіяне: пажылая жанчына, яе дачка і дзве ўнучкі — загінулі на месцы. Сям’я вярталася дадому і ехала ў аэрапорт.
Вядома, што напярэдадні трагедыі абвінавачаны распіваў спіртныя напоі са сваім прыяцелем. Выпітага здалося мала, і ён накіраваўся ў краму на аўтамабілі. Дарогаю ён перадаваў руль свайму таварышу, які наогул не меў пасведчання кіроўцы. Пад раніцу маладыя людзі вырашылі паехаць у госці да знаёмай у Маскву, і кіроўца зняў нумары з машыны. Паводле слоў сведкаў, падчас паездкі ён пастаянна адцягваўся ад кіравання і не заўважыў, як аўтамабіль на вялікай хуткасці набліжаецца да таксі. П’яны кіроўца не паспеў зрэагаваць.
«Прымаючы пад увагу грамадскую небяспеку ўчыненага злачынства, а таксама з улікам асобы абвінавачанага, яму, у адпаведнасці з часткай пятай артыкула 317 Крымінальнага кодэкса Рэспублікі Беларусь, прызначана пакаранне ў выглядзе пазбаўлення волі на максімальны тэрмін, прадугледжаны санкцыяй артыкула, — 10 гадоў з адбываннем пакарання ў папраўчай калоніі ва ўмовах агульнага рэжыму, і пазбаўленне права займацца дзейнасцю, звязанай з кіраваннем транспартнымі сродкамі, на восем гадоў», — гаворыцца ў пастанове суда.
Цяпер чытаюць
Бабарыка пасля сустрэчы з Пратасевічам трапіў у ШІЗА4
Каментары