Паміж Уіткафам і Рубіа ідзе непублічнае суперніцтва адносна фармату мірнага плана па Украіне
Выданне NBC паведаміла пра непублічнае суперніцтва паміж дзяржаўным сакратаром ЗША Марка Рубіа і спецыяльным прадстаўніком прэзідэнта ЗША Стывам Уіткафам у кантэксце прасоўвання «мірных перамоў» па Украіне. Матэрыял грунтуецца на размовах з больш чым дзясяткам дзейных і былых чыноўнікаў ЗША і Еўропы.
Выданне прыводзіць некалькі выпадкаў, калі Уіткаф арганізоўваў міжнародныя сустрэчы па завяршэнні вайны ва Украіне без ведама Рубіа.
Напрыклад, у красавіку 2025 года Рубіа даведаўся, што Уіткаф дамовіўся адносна асабістай сустрэчы з прэзідэнтам Францыі Эмануэлем Макронам у Парыжы. Дзяржсакратар папрасіў далучыцца да яе, але французскае МЗС заявіла, што гэтае пытанне павінен зацвердзіць асабіста Уіткаф. У выніку Рубіа звязаўся з ім і далучыўся да размовы.
У канцы лістапада Уіткаф арганізаваў сустрэчу з украінскай дэлегацыяй у Фларыдзе, пра якую Рубіа даведаўся толькі пасля таго, як украінцы звярнуліся да яго прадстаўнікоў. Паводле аднаго з высокапастаўленых службоўцаў адміністрацыі Трампа, Рубіа фактычна быў выключаны з гэтага працэсу, хоць павінен быў бы кіраваць ім.
Акрамя разыходжанняў адносна мірных намаганняў ва Украіне, Уіткаф таксама канфліктаваў з Рубіа і службоўцамі Дзярждэпартамента па пытаннях бяспекі, асабліва падчас паездак у Расію. Некаторыя прадстаўнікі адміністрацыі ставілі пад сумнеў выкарыстанне Уіткафам уласнага самалёта для палётаў у Маскву без абароненых каналаў сувязі. У маі Дзярждэп ініцыяваў праверку, пасля якой Уіткафа забяспечылі дадатковай аховай і абароненай сістэмай мабільнай сувязі на самалёце. Аднак, паводле некаторых крыніц, існуюць асцярогі, што ён не заўсёды карыстаецца бяспечнай урадавай сістэмай сувязі.
Публічна Белы дом і самі Рубіа ды Уіткаф заяўляюць, што супрацоўнічаюць у дасягненні міру ва Украіне. У лістападзе Рубіа назваў «фэйкам» паведамленні СМІ пра нібыта два супрацьлеглыя падыходы ў адміністрацыі Трампа да вайны РФ супраць Украіны.
Цяпер чытаюць
На Мінскім паўмарафоне памёр 50‑гадовы бягун. Вось што вядома пра Аляксея Дашыневіча16
Каментары