З украінскіх ухілянтаў ад войска ў Беларусі выцягваюць разведвальную інфармацыю
Украінскіх мужчын прызыўнога ўзросту, якім удаецца нелегальна трапіць у Беларусь, падвяргаюць допытам людзі ў цывільным адзенні. Іх цікавяць звесткі пра перамяшчэнне ўкраінскай вайсковай тэхнікі, а таксама пра месцы трапляння расійскіх ракет і дронаў. Пра гэта даведаліся журналісты ўкраінскага выдання «Слідства.Інфо» і Беларускага расследавальніцкага цэнтра.
Мужчыны, якія ўжо здолелі ўцячы з Украіны, абменьваюцца досведам у тэлеграм-чатах з тымі, хто толькі плануе пераход. Яны сцвярджаюць, што допыты з’яўляюцца абавязковымі і, на іх думку, праводзяцца прадстаўнікамі спецслужбаў. Падчас такіх размоў іх фактычна просяць выдаваць пазіцыі і маршруты перасоўванняў украінскай арміі.
Суразмоўцы журналістаў расказваюць, што ў іх забіраюць дакументы і тэлефоны, а адмовіцца ад адказаў амаль немагчыма, бо ніякія правы ў Беларусі фактычна не дзейнічаюць. Людзей ставяць у сітуацыю поўнай безабароннасці перад сілавікамі.
Прадстаўнік Дзяржаўнай памежнай службы Украіны Андрэй Дземчанка адзначае, што рост колькасці ўцёкаў праз Беларусь звязаны з дзейнасцю арганізаваных злачынных груп. Паводле яго слоў, большасць мужчын карыстаецца паслугамі пасярэднікаў, якія арганізуюць нелегальны маршрут.
У арганізацыі былых сілавікоў «Байпол» лічаць, што паток ухілянтаў выгадны рэжыму Лукашэнкі. Гэтых людзей бяруць пад кантроль, атрымліваюць ад іх патрэбную інфармацыю, а пасля фактычна накіроўваюць у бок межаў Еўрапейскага Саюза. Асноўная мэта, як сцвярджаецца, — збор разведвальных звестак.
Журналіст Андрэй Салдатаў, галоўны рэдактар сайта Agentura.ru, не выключае, што сабраная інфармацыя можа перадавацца расійскаму кіраўніцтву і спецслужбам.
Паводле даных украінскіх памежнікаў, у 2025 годзе большасць украінскіх мужчын, якія спрабавалі ўцячы праз Беларусь, затрымліваліся ў Ровенскай і Жытомірскай абласцях, радзей — у Валынскай, Кіеўскай і Чарнігаўскай.
Цяпер чытаюць
Памятаеце былога памежніка, які стаў дальнабойшчыкам і ў Германіі прызнаваўся ў любові да Лукашэнкі? З ім бяда11
Каментары
І што, выдаюць?
Гэтыя ўкраінцы зусім не ў курсе, што ў Беларусі творыцца, які там рэжым?
Беларусы, калі з замежжа ў Беларусь едуць, усе тэлефоны чысцяць, выдаляюць усё, нават лайкі ў інтэрнэце, усе паведамленні, фота, ўліковыя запісы, тэлеграм і ўсё астатняе. І гэта тыя беларусы, якія не засвяціліся ў пратэстах ці акцыях за мяжой, не апазіцыянеры, не актывісты.
У Байполе як звычайна: ва ўсім вінаваты Лукашэнка. Ніколі не вінаваты Пуцін. А цяпер не вінаватыя і самі здраднікі Украіны - ухілянты і тыя ўкраінцы, якія зарабляюць на арганізацыі патока ўхілянітаў.