Валерыі Навадворскай падарылі на дзень народзінаў 40 тысяч даляраў, а яна раздала ўсе грошы журналістам
Пра гэту гісторыю бізнэсовец Альфрэд Кох расказаў у інтэрв'ю Юрыю Дудзю.
Ураджэнец Казахстана і немец з паходжання Альфрэд Кох пачынаў палітычную кар’еру ў Санкт-Пецярбургу — паралельна з Сабчаком, Пуціным, Чубайсам і шматлікімі мясцовымі крымінальнымі аўтарытэтамі, падтрымліваў дэмакратычны рух у Расіі, фінансаваў Барыса Нямцова і Фонд барацьбы з карупцыяй. Сябраваў ён і з палітыкам Валерыяй Навадворскай.
«Што вы думаеце пра Валерыю Навадворскую? Ці было пераасэнсаванне яе?», — спытаў Юрый Дудзь, намякаючы на тое, што Навадворская адразу папярэджвала пра небяспеку Пуціна, а дэмсупольнасць не ўспрымала папярэджанні.
«У мяне ніякага пераасэнсавання не было, я адразу лічыў, што яна вялікая жанчына, я ёй заўжды дапамагаў, у нас былі вельмі пяшчотныя адносіны. Гэта была нейкая з’ява, незямное, «не наша». Чалавек, які быў цалкам пазбаўлены нейкіх нізкіх жаданняў, не ад гэтага свету. Я неяк падарыў ёй грошай, здаецца, на 60 гадоў, салідную суму — 40 тысяч даляраў. Яна іх раздала журналістам часопіса «Новое время».
Я на яе крычаў: «Лера, ты што? Ты цётка: інвалід, з маці старэнькай, здаровых мужыкоў, які сябе пракарміць не могуць, падтрымліваеш?». «Я не магу, яны мае таварышы», — адказала яна», — расказаў Альфрэд Кох.
«Усё, што яна тады казала пра Пуціна, тады было зразумела, ці рэтраспектыўна прыйшло?» — спытаў Дудзь.
«Мне тады здавалася, што яна перагібае, вектар правільны, але перагібае. Зараз так не здаецца». «Пуцін дацягнуў да яе планкі, тады не дацягваў, а цяпер дацягнуў, яна абазначыла, і ён дацягнуў», — дадаў Кох.
Валерыя Іллінічна Навадворская нарадзілася ў 1950 годзе ў Баранавічах, калі яе бацькі былі ў яе дзядулі і бабулі на канікулах. Ужо ў 1969 годзе ў Маскве арганізавала падпольную групу, каб змагацца з камуністычным рэжымам. Была арыштавана і асуджана на тры гады. Потым неаднаразова пераследавалася савецкімі ўладамі. У 1992 года заснавала партыю «Дэмакратычны саюз». Потым заснавала партыю «Заходні выбар». Была бескампрамісным крытыкам расійскай улады і Уладзіміра Пуціна. Памерла ў ліпені 2014 года.
Цяпер чытаюць
У Чэхіі малады беларус трапіў у кому — наглытаўся таблетак праз праблемы з легалізацыяй і разрыў з дзяўчынай22
Каментары