У «разумных» футболках «Найка» дзіўна паводзяць сябе плечы. Кампанія прызнала праблему
Калі ў канцы сакавіка кампанія Nike прэзентавала сваю калекцыю гульнявой формы для зборных да чэмпіянату свету па футболе 2026 года, фанаты і эксперты хвалілі навінку. Аднак гульнявая абкатка сапсавала ўсё ўражанне.
Новая калекцыя ад Nike мела стаць вяршыняй тэхналагічнага прагрэсу ў спартыўным адзенні. Распрацоўшчыкі выкарысталі сістэму Aero-FIT — высокатэхналагічны метад ткання, створаны з дапамогай камп’ютарнага мадэлявання і штучнага інтэлекту.
Па задумцы «разумныя» футболкі павінны ідэальна адводзіць вільгаць і ахалоджваць цела, што крытычна важна для будучага чэмпіянату свету, матчы якога пройдуць ва ўмовах экстрэмальнай летняй спякоты ў ЗША, Мексіцы і Канадзе.
Магчымасць апрабаваць інавацыю на практыцы з’явілася падчас сакавіцкага міжнароднага перапынку — традыцыйнай паўзы ў нацыянальных чэмпіянатах, калі гульцы пакідаюць клубы і з’язджаюцца ў зборныя. Аднак менавіта гэтая прэм’ера абярнулася для Nike канфузам, паведамляе The Guardian.
Увагу гледачоў прыкавала адна дэталь — плечавыя швы ўздуваюцца. Калі на форме зборнай ЗША гэта было ледзь заўважна, то на футболцы Кіліяна Мбапэ дэфект выглядаў амаль камічна. Больш за ўсё не пашанцавала ўругвайцам: праз дзіўную форму плячэй гульцоў пачалі параўноўваць са Шрэдэрам — галоўным злодзеем з «Чарапашак-ніндзя».
Падобныя праблемы хутка пачалі адзначаць і звычайныя людзі. У інтэрнэце з’явіліся водгукі людзей, якія набылі новыя футболкі і сутыкнуліся з тым жа дэфектам. Некаторыя сцвярджалі, што змаглі крыху выправіць сітуацыю з дапамогай адпарвальніка або прання перад выкарыстаннем.
Але іншыя былі значна больш катэгарычныя. Адзін з канадскіх фанатаў на Reddit напісаў, што канструкцыя плячэй «зроблена так, што тканіна ў любым выпадку будзе збірацца ў складкі», асабліва калі ў чалавека шырокія плечы. Ён назваў дызайн «тупым».
Для людзей, якія заплацілі за такую футболку ад 100 да 200 даляраў, гэта малапрыемнае адкрыццё. Тым больш для нацыянальных зборных і саміх футбалістаў, для якіх важныя не толькі камфорт, але і выгляд на галоўным футбольным турніры свету.
У Nike на крытыку адрэагавалі. Кампанія прызнала, што праблема сапраўды існуе, і паведаміла, што вывучае магчымыя шляхі яе вырашэння. Паводле прадстаўніка брэнда, падчас апошніх міжнародных матчаў была зафіксавана «невялікая праблема», найбольш прыкметная ў зоне плечавога шва. Пры гэтым у Nike падкрэслілі, што на функцыянальнасць формы гэта не ўплывае, але эстэтыка «не адпавядае належнаму ўзроўню».
Цяпер кампанія вядзе перамовы з футбольнымі федэрацыямі і партнёрамі па вытворчасці, каб вызначыць наступныя крокі. Пакуль незразумела, ці будзе дызайн формы нейкім чынам зменены і ці змогуць пакупнікі разлічваць на нейкую кампенсацыю. Сітуацыю ўскладняе і тое, што да пачатку турніру засталося крыху больш за два месяцы, а вялікую колькасць футболак ужо прадалі.
Цяпер чытаюць
Новы пасол Украіны па пытаннях Беларусі: «Прызнаём Ціханоўскую прэзідэнтам. А ў Лукашэнкі няма манаполіі на голас народа»13
Каментары