ЗША і Іран не змаглі дасягнуць пагаднення ў Ісламабадзе. Вэнс паехаў з Пакістана
Віцэ-прэзідэнт ЗША Джэй Дзі Вэнс заявіў, што напружаныя перамовы з Іранам у Ісламабадзе, якія доўжыліся больш за 21 гадзіну, завяршыліся без падпісання мірнага пагаднення. Асноўнай прычынай правалу стала адмова Тэгерана прыняць умовы ЗША, у прыватнасці — адсутнасць «фундаментальнага абавязацельства» Ірана не распрацоўваць ядзерную зброю.
«У нас быў шэраг змястоўных дыскусій з іранцамі, гэта добрая навіна. Дрэнная навіна ў тым, што мы не дасягнулі пагаднення, і я думаю, што гэта дрэнная навіна для Ірана ў значна большай ступені, чым для Злучаных Штатаў Амерыкі», — сказаў Вэнс.
«Мы проста не змаглі прыйсці да сітуацыі, калі іранцы прынялі б нашы ўмовы», — сказаў Вэнс перад адлётам.
Пазіцыя Дональда Трампа
Прэзідэнт ЗША Дональд Трамп заявіў журналістам, што яго не хвалюе вынік сустрэчы. Паводле яго слоў, Вашынгтон ужо выйшаў з гэтай вайны пераможцам.
«Для мяне не мае значэння, заключым мы пагадненне ці не. Справа ў тым, што мы перамаглі», — заявіў Трамп.
Ён сцвярджае, што ЗША цалкам разграмілі іранскія ВПС, ВМС і кіраўніцтва краіны.
Трамп таксама паведаміў пра пачатак аперацыі па размініраванні Армузскага праліва сіламі ВМС ЗША, паскардзіўшыся, што «НАТА не дапамагло».
Ход перамоў і спрэчныя пытанні
Перамовы праходзілі ў трохбаковым фармаце з удзелам Пакістана.
Іранскую дэлегацыю ўзначальваў спікер парламента Махамад-Багер Галібаф, амерыканскую — віцэ-прэзідэнт Джэй Дзі Вэнс, спецпасланнік Стыў Уіткаф і Джарэд Кушнер.
Перамовы стартавалі на фоне паведамленняў СМІ аб згодзе Вашынгтона разблакаваць замарожаныя іранскія актывы, а таксама аб'явы Дональда Трампа аб пачатку аперацыі па размініраванні Армузскага праліва, піша ВВС.
Галоўны тупік — Армузскі праліў. Паводле звестак Financial Times, Іран настойвае на захаванні поўнага кантролю над пралівам і спагнанні платы з судоў, тады як ЗША патрабуюць свабоднага праходу і размініравання.
Падчас перамоваў іранскія СМІ пісалі, што ЗША нібыта вылучаюць «празмерныя патрабаванні» ў дачыненні да Армузскага праліва і «непрымальныя патрабаванні па шэрагу іншых пытанняў».
Ядзернае пытанне. Для Вашынгтона ключавым застаецца патрабаванне поўнай адмовы Тэгерана ад ядзерных амбіцый.
Замарожаныя актывы. Былі супярэчлівыя паведамленні аб тым, ці пагадзіліся ЗША разблакіраваць іранскія грошы ў банках Катара. Афіцыйнага пацверджання гэтаму няма.
МЗС Ірана паведаміла, што бакі дасягнулі паразумення па шэрагу пунктаў, аднак па некалькіх ключавых тэмах меркаванні разышліся.
Асноўнай перашкодай там назвалі атмасферу ўзаемнага недаверу. Пры гэтым іранскі бок адзначыў, што імгненнага выніку ад адной сесіі ніхто і не чакаў, таму дыялог будзе працягвацца.
Сітуацыя ў Ліване
Іран звязвае пытанне суднаходства ў Армузскім праліве з ударамі Ізраіля па Ліване. Тэгеран патрабуе спынення атак на Бейрут як умову перамір'я. У сваю чаргу Ізраіль за апошнія суткі нанёс удары па 200 аб’ектах «Хезбалы» і рыхтуецца да прамых перамоваў з урадам Лівана ў Вашынгтоне на наступным тыдні.
Міністр замежных спраў Пакістана Мухамад Ісхак Дар заклікаў абодва бакі працягваць выконваць рэжым спынення агню, нягледзячы на адсутнасць фінальнага дакумента. Паводле яго слоў, Пакістан працягне садзейнічаць дыялогу ў бліжэйшыя дні.
Цяпер чытаюць
У Быхаве паставілі выродлівы помнік жанчыне. Разам са скульптурай у Касцюковічах ён можа стаць сімвалам культурнай дэградацыі Беларусі пры Лукашэнку6262
Каментары
Интересно, что он напишет, когда иранцы начнут топить танкеры в Ормузе и продолжать бить по саудитам, оманцам и катарцам ?