Трамп заявіў, што «Праект Свабода» у Армузскім праліве будзе прыпынены

Прэзідэнт ЗША Дональд Трамп заявіў, што аперацыя па суправаджэнні затрыманых у Персідскім заліве суднаў будзе прыпыненая на «кароткі прамежак часу», каб ацаніць магчымасць заключэння мірнага пагаднення з Тэгеранам, піша Бі-бі-сі.

Па яго словах, «Праект Свабода», рэалізацыя якога пачалася ў панядзелак, будзе прыпынены па просьбе Пакістана, які выступае пасрэднікам на перамовах, а таксама іншых краін.

Трамп напісаў у Truth Social, што рашэнне было прынята ў сувязі з «велізарнымі ваеннымі поспехамі» і «значным прагрэсам» у дасягненні мірнага пагаднення з Іранам.

«Пакуль блакада будзе захоўвацца, «Праект Свабода» (прапуск суднаў праз Армузскі праліў) будзе прыпынены на кароткі прамежак часу, каб высветліць, ці ўдасца завяршыць і падпісаць пагадненне», — дадаў ён.

Цэны на нафту нязначна знізіліся на пачатку таргоў у Азіі ў сераду на фоне заяўленняў Трампа.

Іранскія дзяржаўныя СМІ заявілі, што прыпыненне аперацыі сведчыць аб тым, што Трамп «адступіў» пасля серыі няўдач у спробах разблакаваць жыццёва важны для сусветнага суднаходства водны шлях.

Заява Трампа прагучала неўзабаве пасля таго, як дзяржсакратар ЗША Марко Рубіа заявіў на брыфінгу ў Белым доме, што аперацыя «Эпічны гнеў», якая пачалася ў канцы лютага, дасягнула сваіх мэтаў, і Вашынгтон пераходзіць да наступнага этапу, то бок «Праекту Свабода».

«Мы аддалі перавагу шляху міру. Прэзідэнт аддаў бы перавагу заключыць пагадненне», — сказаў кіраўнік Дзярждэпа ў аўторак вечарам.

Кажучы аб праекце, Рубіа адзначыў, што ён носіць выключна абарончы характар. «Стральбы не будзе, пакуль у нас не стрэляць першымі», — дадаў ён.

Раней Цэнтральнае камандаванне ЗША (CENTCOM) заяўляла, што ў аперацыі па суправаджэнні суднаў будуць задзейнічаны эсмінцы, самалёты і 15 тысяч вайскоўцаў.

Генерал Дэн Кейн, старшыня Аб'яднанага камітэта начальнікаў штабоў, заявіў у аўторак, што ў Персідскім заліве заблакавана больш за 1 500 суднаў, на борце якіх знаходзіцца прыблізна 22 500 маракоў. 

Заявы Вашынгтона прагучалі на фоне серыі атак у Армузскім праліве — гэта выклікала асцярогі, што перамір'е знаходзіцца пад пагрозай зрыву. ЗША заявілі, што іх мэта — вывесці затрыманныя судны з Персідскага заліва.

У панядзелак Трамп заявіў, што Іран будзе «знесены з твару Зямлі», калі паспрабуе атакаваць амерыканскія суды, якія ўдзельнічаюць у аперацыі.

Тэгеран апошнія заявы ЗША пакуль не каментаваў, аднак спікер іранскага парламента Махамед-Багер Галібаф заяўляў у аўторак, што ЗША і саюзнікі паставілі пад пагрозу бяспеку суднаходства ў праліве «з-за парушэнняў рэжыму спынення агню і ўвядзення блакады» супраць Ірана.

«Аднак іх зладзействы не ўвянчаюцца поспехам», — сказаў ён.

Позня ўвечары ў аўторак Упраўленне марскіх гандлёвых аперацый Вялікабрытаніі паведаміла са спасылкай на крыніцы, што ў Армузскім праліве грузавое судно было паражанае «невядомым снарадам». Больш падрабязнай інфармацыі пра інцыдэнт пакуль няма.

У аўторак улады Аб’яднаных Арабскіх Эміратаў заявілі, што іх сістэмы СПА другі дзень запар перахопліваюць іранскія ракеты і дроны, назваўшы гэта небяспечнай эскалацыяй. Іран адмаўляе, што наносіў удары па ААЭ.

Аперацыя «Эпічны гнеў» пачалася 28 лютага, калі ЗША і Ізраіль нанеслі серыю авіяўдараў па Іране. Тэгеран заблакаваў Армузскі праліў, па якім да вайны праходзіла каля 20% сусветных паставак нафты і звадкаванага прыроднага газу.

• 0
• 0
• 2
• 3
• 0
• 1
• 0
• 0