Беларус паехаў рэзаць брокалі ў Нідэрланды і паказаў, колькі зарабляе і што застаецца за кадрам
Беларус Іван Жур другі сезон працуе на фермах у Нідэрландах. Ён шчыра расказвае ў сацсетках, колькі ўдаецца зарабіць, на што ідуць грошы і чым насамрэч даводзіцца плаціць за прыгожыя кадры з Еўрасаюза.
А шостай раніцы Іван Жур ужо збіраецца ў поле. Наперадзе можа быць спёка, дождж ці вецер — брокалі трэба зрэзаць у любым выпадку. Увечары ён вернецца, прыгатуе вячэру, часам паспее ў залу, а ў 22:00 ляжа спаць: будзільнік зноў прагучыць а 5:30. За такі графік на карту можа прыйсці больш за тры тысячы еўра. А можа атрымацца і месяц, пасля якога амаль няма чаго адкладаць.
Іван з Маладзечна. У яго ёсць дыплом настаўніка, але працаваць у школе за заробак каля тысячы рублёў ён не захацеў. Перад гэтым чатыры гады адпрацаваў на будоўлі ў Маскве. Вярнуўся ў Беларусь, не знайшоў прыдатнай працы і вырашыў паспрабаваць сябе ў Нідэрландах.
Ён не плануе там асесці. Дома засталася жонка Аляксандра. Адной з галоўных мэтаў паездак на заробкі Іван называе вырашэнне жыллёвага пытання. Калі падпісчык параіў яму адпачыць ад такой працы, беларус адказаў: «Я б з радасцю, але кватэра сама сябе не купіць». Просценькую кватэру на 36 метраў ён змог купіць ужо пасля першага сезона ў Нідэрландах у 2025 годзе. Цяпер ён паехаў на заробкі зноў і распавядае пра гэта ў сваім блогу.
Ад 399 еўра ў маі да 3391 еўра ў чэрвені
У Нідэрланды Іван едзе праз польскае агенцтва. Спачатку афармляе польскую працоўную візу і каля месяца працуе ў Польшчы — такую ўмову ставіць яго агенцтва. Пасля кампанія накіроўвае яго да нідэрландскіх фермераў.
Пачатак сезона 2026 года атрымаўся няўдалым. Прыехаўшы ў Нідэрланды ў канцы красавіка, Іван пяць дзён сядзеў без працы. Потым чатыры дні адпрацаваў на кветках, а на ферме з півонямі яго звольнілі праз паўдня: гаспадар палічыў, што ён працуе недастаткова хутка. Давялося чакаць наступнага месца.
За ўвесь май, паводле Івана, набралася толькі 79 працоўных гадзін. На карту прыйшло 1179 еўра. З іх ён асобна аплаціў жыллё ў Нідэрландах, жыллё за час працы ў Польшчы і трансфер паміж краінамі — разам 780 еўра. Засталося прыкладна 399 еўра, яшчэ да паўсядзённых выдаткаў на ежу.
«Так, вельмі маленькая сума, я расчараваны», — напісаў ён падпісчыкам. Таму, разважае Іван, кароткая паездка на месяц-два можа не акупіцца: пачатковыя абавязковыя выдаткі не паспеюць адбіцца некалькімі заробкамі.
Летам карціна змянілася. У чэрвені Іван адпрацаваў 241 гадзіну і атрымаў на карту 3391 еўра пасля падаткаў і выліку за жыллё. У ліпені — 240 гадзін і 3354 еўра. Жыллё фермер, паводле яго тлумачэння, аплачвае праз вылік, эквівалентны 5,75 працоўнай гадзіны за тыдзень.
У Івана няма гарантаванага заробку за месяц. Ураджай расце нераўнамерна, надвор’е змяняе планы фермера, а разам з імі — колькасць гадзін. За адзін тыдзень у ліпені ён, паводле свайго падліку, адпрацаваў 75 гадзін 30 хвілін. За няпоўны тыдзень пасля адпачынку ў Беларусі — толькі 20 гадзін.
Што застаецца за прыгожымі кадрамі
Іван расказвае і пра другі бок медаля — працу ў полі ў трыццаціградусную спёку і непагадзь, а таксама цяжкія ўмовы ў летніх цяпліцах. Паводле яго слоў, здараліся і выпадкі, калі брыгадзіры кідалі ў работнікаў гнілыя памідоры за павольную працу. «І гэта не жарт», — сцвярджае Іван.
«Не хачу вас палохаць, проста хачу, каб вы ведалі, што стаіць за гэтымі прыгожымі карцінкамі з Амстэрдама», — тлумачыў ён падпісчыкам. Замест падарожжаў там часта праца па 12 гадзін на дзень і адзін выхадны на тыдзень. Тады Іван нават пісаў, што расчараваўся і надоўга яго не хопіць: лепш, маўляў, паступова развівацца ў Беларусі побач з сям’ёй. Паводле яго, грошы дапамагаюць ісці да мэты, але з кожным напружаным тыднем усё больш зразумела, чаго яны каштуюць.
«Хачу зарабляць галавой, а не рукамі»
Пасля аднаго з заробкаў Іван параўнаў яго з працай у Маскве: там, паводле яго слоў, атрымліваў у два з паловай разы менш. Але і называць нідэрландскія тысячы «лёгкімі грашыма» ён не збіраецца.
У жніўні беларус на два тыдні з’ездзіў да жонкі. Дарогу з Нідэрландаў у Маладзечна ён падлічыў асобна: 37 гадзін і 151 еўра. Калі вярнуўся, напісаў, што наступным разам лепш паспрабуе запрасіць Аляксандру да сябе — так цяжка яму даюцца гэтыя паездкі. Сёлета яны хацелі папрацаваць у Нідэрландах разам, але жонцы, паводле Івана, адмовілі ў польскай візе.
Цяпер ён кажа, што наступны сезон хацеў бы зрабіць апошнім. Яго план — вярнуцца да жыцця, у якім праца не займае амаль увесь дзень.
«Ужо хачу пачаць зарабляць галавой, а не рукамі», — напісаў Іван пасля паездкі дадому.
Каментары
[Зрэдагавана]
Спадарства, калі вам хітрыя суайчыннікі, украінцы, ці палякі кажуць што вы едзеце ў камандзіроўку легальна з польскай візай – ведайце, гэта ХЛУСНЯ! І тое што яны кажуць, што тысячы людзей так працуюць, гэта не пазначае што яны робяць гэта легальна. Пасля праверкі, вы едзеце на радзіму і атрымліваеце штраф і забарону на ўезд да Еўразвязу, а вашаму працадаўцы на вас і вашыя праблемы абыякава.
Думайце сваёй галавой, дасканала ведайце законы і працуйце ў Польшчы з польскай візай. Поспехаў, stay safe.