У Мінску з'явіўся таямнічы тралейбус, для праезду ў якім патрэбныя два талончыкі
У Threads абмяркоўваюць сітуацыю з тралейбусамі №22, 40 і 40А.
Пасажыры заўважылі незвычайную сітуацыю: можна ехаць на адным і тым жа тралейбусе праз «Кахоўскую», нікуды не выходзячы, але за праезд усё роўна давядзецца заплаціць двойчы, піша Onliner.by.
Так адбываецца таму, што з-за будаўнічых работ змянілася схема руху тралейбусаў. Раней «Кахоўская» была звычайным прыпынкам па маршруце, а канцавым для №40, напрыклад, была ДС «Карастаянавай».
Зараз тралейбусы ідуць ад Камароўскага рынку праз Багдановіча і Кульман да «Кахоўскай», якая паводле пашпарта маршруту лічыцца канцавым прыпынкам.
Пасля гэтага той жа тралейбус працягвае рух па бульвары Шаўчэнкі і вуліцы Веры Харужай.
У «Мінсктрансе», адказ якога апублікавала карыстальніца Threads, патлумачылі: на «Кахоўскай» заканчваецца рух у адным напрамку і пачынаецца зваротны.
Таму, калі пасажыр едзе, напрыклад, ад Камароўскага рынку да Крапоткіна праз «Кахоўскую», гэта лічыцца двума паездкамі — і аплаціць праезд трэба двойчы.
У каментарах пасажыры прыводзяць і іншыя прыклады. Адна з удзельніц абмеркавання расказала, што ў аўтобусе №127 ад Серабранкі да вакзала ёй таксама даводзіцца плаціць двойчы: паводле яе слоў, вакзал не з'яўляецца канцавым прыпынкам у адным напрамку, але з'яўляецца першым прыпынкам зваротнага маршруту.
Іншыя раяць на час рамонту карыстацца праязным. У адказ аўтарка абмеркавання заўважае, што гэта не вырашае пытання: незразумела, чаму з-за змены маршруту паездку трэба аплачваць двойчы.
Сваім меркаваннем з Onliner падзялілася яшчэ адна чытачка.
Паводле яе слоў, пасля пачатку будаўніцтва метро жыхарам бульвара Шаўчэнкі стала складаней дабірацца з боку Якуба Коласа. Цяпер тралейбусы №22 і №40 дазваляюць даехаць туды без перасадкі, хоць і па змененым маршруце.
— Cтала зручна з боку Коласа ехаць — сеў на тралейбус №22 або 40, праехаў праз Кульмана, Кахоўскую, Шаўчэнку, выйшаў дзе трэба. Але аказваецца, паколькі на Кахоўскай канцавы прыпынак, трэба зноў аплачваць праезд, хоць ты ўжо заплаціў і табе засталося праехаць яшчэ пару прыпынкаў. Атрымліваецца, быццам прамы транспарт ёсць, хоць і з аб’ездам, але плаціш двойчы, хоць едзеш на адным тралейбусе, — распавяла дзяўчына.
У «Мінсктрансе» патлумачылі, што праезд па гэтай схеме часовы — пасля заканчэння работ тралейбусы зноў павінны пайсці па бульвары Шаўчэнкі ў абодвух напрамках.
Цяпер чытаюць
Стала вядома пра смерць доўгажыхаркі Марыі Канановіч з Валожыншчыны, якой па пашпарце быў 121 год1
Каментары
🤔
даволі доўгі час на канцавым прыпынку "сапераў" круцілі запіс з патрабаваннем аплаціць далейшы праезд паўторна. (два прыпынкі там яшчэ можна ехаць да вяртання на зваротны шлях) Ніхто ніколі не аплачваў. Апошнім часам запіс круціць перасталі.