Палітвязень Вацлаў Арэшка канчаткова ў калоніі страціў зрок, але змог сам напісаць некалькі слоў сваім унукам
«Раней бачыў свет і цень, цяпер ужо і гэтага няма. А пра тое, як гэтаму дае рады, нічога не расказвае, абыходзіць гэтую цяжкую тэму», — кажа ягоная сваячка.
Палітвязень, асуджаны на восем гадоў актывіст незалежнага прафсаюзу радыёэлектроннай прамысловасці Вацлаў Арэшка стаў цалкам невідушчым. Пра гэта паведаміла сваячка палітвязня, піша Радыё Свабода.
«Раней бачыў свет і цень, цяпер ужо і гэтага няма. А пра тое, як гэтаму дае рады, нічога не расказвае, абыходзіць гэтую цяжкую тэму. Тры дні таму даслаў ліст, павіншаваў унукаў з днямі нараджэння. Некалькі слоў нават напісаў сваёй рукой, праўда, неразборліва ў яго атрымалася, амаль нічога не ўдалося прачытаць, але добра, што намагаецца», — распавяла пра Вацлава Арэшку ягоная сваячка.
Паводле крыніцы, адміністрацыя калоніі № 22, дзе трымаюць палітвязня Арэшку, прапаноўвала яму этапам адправіцца ў шпіталь, але ён адмовіўся.
«Наколькі ведаю, баіцца ехаць у шпіталь, бо можа не вытрымаць этапу. Тое, што распавядаў пра Вацлава журналіст Семчанка, — усё так і ёсць», — дадала крыніца.
У верасні пра дрэнны стан Вацлава Арэшкі распавядаў на тэлеканале «Белсат» журналіст Дзмітрый Семчанка, які адбываў свой тэрмін у той жа івацэвіцкай калоніі.
«У яго адслаілася сятчатка, і было ўсё горш і горш. Мы вадзілі яго ўжо, каб патэлефанаваць, мы яго вадзілі да кухні літаральна. Ён ходзіць, але ён нічога не бачыць. Калі ён спачатку бачыў, калі не вельмі сонечны дзень, калі не слепіць яго сонца, то ў цемры ён ужо не бачыць, ён не можа выйсці ноччу ў прыбіральню. Праз такія пакуты гэты чалавек праходзіць. Гэта, ну, не перадаць словамі», — распавядаў былы палітвязень Дзмітрый Семчанка.
Вацлаву Арэшку 71 год. Паводле сваячкі палітвязня, ён таксама мае іншыя хваробы.
«Яшчэ ў яго ціск, спіна, праблемы з нагамі. Становіцца ўсё горш», — паведаміла крыніца пра здароўе Вацлава Арэшкі.
Цяпер чытаюць
Святлана Ціханоўская пра крытыку з боку Ціханоўскага: Мне ад гэтага вельмі крыўдна і непрыемна44
Святлана Ціханоўская пра крытыку з боку Ціханоўскага: Мне ад гэтага вельмі крыўдна і непрыемна
«Доктарка», адвакат, чалавек з камерай і некалькі дужых хлопцаў. У Петрапаўлаўскай Баршчагоўцы расійскія спецслужбы скарысталіся спецыфічным украінскім бізнэсам ваеннага часу1313
Каментары
бо Вацлаў не скараецца, ня будзе прасіць, падпісваць і пісаць ніякіх просьбаў пра памілаваньне.
Праваабаронцы ўключылі Вацлава Арэшку ў сьпіс 170 палітвязьняў, асабліва ўразьлівых з прычыны стану здароўя, і дамагаюцца яго найхутчэйшага вызваленьня.
Паводле інфармаваных крыніц, прозьвішча Вацлава Арэшкі цягам году было ў сьпісах вязьняў, пра якіх з удзелам амэрыканскага боку вядуцца перамовы аб вызваленьні, але зь невядомых прычын ён дагэтуль ня выйшаў на волю, у адрозьненьне ад іншых актывістаў незалежных прафсаюзаў, якія праходзілі ў адной зь ім справе.