Расійскі цэнтр навукі і культуры адкрыты ў Мінску 2

Міністры замежных спраў Беларусі Сяргей Мартынаў і Расіі Сяргей Лаўроў 23 лістапада ўзялі ўдзел у цырымоніі адкрыцця Расійскага цэнтра навукі і культуры, што ў Мінску па вул. Ракаўская, 16Б.

Як заявіў на цырымоніі Лаўроў, «гісторыя, культура, духоўная агульнасць, моўныя карані аб’ядноўваюць Беларусь і Расію ў адзіную гуманітарную прастору». Ён падзякаваў беларускаму боку за памяшканне для цэнтра, але адзначыў, што яно часовае — найбліжэйшым часам плануецца пачаць будаўніцтва пастаяннага будынка.

Мартынаў падкрэсліў, што «духоўна-культурная агульнасць нашых народаў налічвае стагоддзі». «У нас вялікая духоўна-культурная спадчына, агульнасць, якую мы не павінны страціць. Адкрыццё Расійскага цэнтра навукі і культуры ў Мінску дазваляе атрымаць доступ да агульнай спадчыны», — заявіў ён.

Мартынаў выказаў надзею, што ў Маскве будзе адкрыты аналагічны Беларускі цэнтр навукі і культуры.

Кіраўнікі МЗС Беларусі і Расіі абмяняліся падарункамі. Лаўроў уручыў беларускаму калегу падарункавае выданне кнігі «История Кремля», Мартынаў у адказ — «Наследие Беларуси».

БелаПАН

Хочаш падзяліцца важнай інфармацыяй ананімна і канфідэнцыйна? Пішыце рэдактару «Нашай Нівы» ў ТГ