У Гомелі 6 сакавіка прайшоў з’езд абласной арганізацыі Партыі БНФ, у якім узялі ўдзел старшыня партыі Аляксей Янукевіч і былы кандыдат у прэзідэнты Рыгор Кастусёў.Падчас з’езду спадар Кастусёў зрабіў шэраг нечаканых заяў, а прысутныя на сходзе журналісты іх апублікавалі.
«Наша Ніва» звярнулася да былога кандыдата ў прэзідэнты па каментар.
«НН»: Учарашняя ваша заява, зробленая ў Гомелі, выклікала шмат абмеркаванняў у інтэрнэце. Вы ведалі, што на сходзе прысутнічае журналіст?
Рыгор Кастусёў: Шчыра кажучы, аб гэтым я даведаўся толькі пасля завяршэння мерапрыемства. Безумоўна, што шмат аб чым я б не гаварыў, калі б ведаў, што ўсё сказанае мной будзе апублікавана. На пытанні сяброў партыі я б адказваў шчыра, але ад сябе гаварыў бы іначай. У нас ужо ва ўсіх абласных гарадах прайшлі падобныя сустрэчы. На некаторых з іх прысутнічалі журналісты, у прыватнасці, у Гродне. Аднак мы прасілі іх пакуль не публікаваць маіх заяваў. У Гомелі выйшла іначай.
«НН»: Вас зараз шмат хто абвінавачвае ў сувязях з КДБ, ускоснай падтрымцы Лукашэнкі. Як можаце пракаментаваць гэта?
РК: Ведаеце, у сувязі з КДБ можна абвінаваціць каго заўгодна.
Паўтаруся, што гэта не была заява для прэсы, я не хацеў публічна некага ў нечым вінаваціць.Проста адказваў на пытанні сяброў па партыі, а таксама выступаў перад імі ў якасці
«НН»: Пасля ўчарашняй заявы да вас паўстане шмат пытанняў. Калі плануеце расказаць усе падрабязнасці выбарчай кампаніі?
РК: Я не першы раз гавару, што мне прапаноўвалі зняцца з выбараў. Яшчэ ўвосень аб гэтым заяўляў, таму тут няма нічога сенсацыйнага. Абяцаю расказаць усё і адказаць на ўсе пытанні пасля таго, як усе ўдзельнікі выбарчай кампаніі выйдуць на свабоду.
Склікаць зараз адмысловуюпрэс-канферэнцыю і раскрываць падрабязнасці было б непрымальна з маральнага пункта бачання.
«НН»: Вашы сустрэчы з сябрамі Партыі БНФ працягнуцца. Будзеце больш асцярожным зараз, плануеце пускаць журналістаў на сходы?
РК: Так, сустрэчы працягнуцца. Што датычыць асцярожнасці, то я буду шчыра і праўдзіва адказваць на пытанні аднапартыйцаў. А ці захочуць арганізатары сустрэчаў бачыць на іх журналістаў — не мая справа. Усё будзе так, як зробяць арганізатары на месцах.
Каментары